இந்தியா - ஆஸ்திரேலியா இடையிலான முதல் டெஸ்ட் அடிலெய்டில் நடைபெற்றது. இதில் இந்தியா 8 விக்கெட் வித்தியாசத்தில் படுதோல்வியடைந்தது. ரோகித் சர்மா இல்லாததால் தொடக்க வீரர் வரிசையில் பிரித்வி ஷா- ஷுப்மான் கில்லுக்கு இடையே கடும் போட்டி நிலவியது.
பயிற்சி ஆட்டத்தில் ஷுப்மான் கில்தான் சிறப்பாக விளையாடினார். ஆனால், பிரித்வி ஷாவிற்கு வாய்ப்பு வழங்கப்பட்டது. முதல் இன்னிங்சில் 0, 2-வது இன்னிங்சில் 4 என சொற்ப ரன்களில் ஆட்டமிழந்தார் பிரித்வி ஷா. இதனால் மெல்போர்ன் டெஸ்டில் பிரித்வி ஷா நீக்கப்பட்ட வாய்ப்புள்ளது.
விராட் கோலி மெல்போர்ன் டெஸ்டில் விளையாடவில்லை. அவரது இடத்தில் ஷுப்மன் கில் விளையாட வாய்ப்புள்ளது. இதனால் தொடக்க வீரராக கேஎல் ராகுல் களம் இறக்கப்படவாய்ப்புள்ளது.
பயிற்சி ஆட்டத்தில் ரிஷப் பண்ட் சதம் அடித்த போதிலும், அவருக்குப் பதிலாக சாஹா சேர்க்கப்பட்டார். அவர் 9, 4 ரன்கள் மட்டுமே அடித்தார். அதனால் சாஹா நீக்கப்பட்டு ரிஷப் பண்ட் சேர்க்கப்பட வாய்ப்புள்ளது.
முகமது ஷமி காயத்தால் வெளியேறியுள்ளார். இதனால் அவருக்குப் பதிலாகவும் மற்றொரு வீரர் தேர்வு செய்யப்பட இருக்கிறார். இதனால் பாதி அணி மாற்றம் செய்யப்பட வாய்ப்புள்ளது.
