பிக் பாஷ் லீக்கை மேலும் பிரபலப்படுத்த நியூசிலாந்தின் அணிகளையும் சேர்க்க வேண்டும்: மெக்கல்லம்

ஆஸ்திரேலியா கிரிக்கெட் போர்டு சார்பில் ஆண்டுதோறும் பிக் பாஷ் டி20 லீக் தொடர் நடைபெற்று வருகிறது. டிச்மபர் - ஜனவரியில் நடைபெறும் இந்தத் தொடரில் 8 அணிகள் பங்கேற்று விளையாடுகின்றன. தற்போது கிரிக்கெட் போட்டிகள் அனைத்தும் ஒத்திவைக்கப்பட்டுள்ளது. ஒருவேளை பிக் பாஷ் டி20 லீக் ஆஸ்திரேலிய ரசிகர்களுக்கு முதல் கிரிக்கெட் தொடராகக்கூட இருக்கலாம். வெளிநாட்டைச் சேர்ந்த வீரர்கள் எந்த அளவிற்கு கலந்து கொள்ள முடியும் என்பதை இதுவரை தெளிவாக வரையறுக்க முடியாத நிலை உள்ளது.

இந்த சூழ்நிலையில் தொடரை மேலும் பிரபலப்படுத்த நியூசிலாந்தில் உள்ள சில அணிகளையும் சேர்க்க வேண்டும் என நியூசிலாந்தின் அதிரடி பேட்ஸ்மேன் பிரெண்டன் மெக்கல்லம் தெரிவித்துள்ளார்.

இதுகுறித்து பிரெண்டன் மெக்கல்லம் கூறுகையில் ‘‘தற்போது சர்வதேச கிரிக்கெட் விளையாட்டுகள் இல்லாததால் பிக் பாஷ் லீக் தொடருக்கு நான் சொன்ன கருத்து மிகப்பெரிய வாய்ப்பாக அமையும். ஆஸ்திரேலிய ரசிகர்களுக்கு போட்டியை கொண்டு சேர்க்கும்போது நியூசிலாந்து அணிகளும் இருந்தால் கூடுதல் ஆதரவாக இருக்கும்.

ஊரடங்கு உத்தரவு காரணமாக வெளிநாட்டு வீரர்கள் ஆஸ்திரேலியாவுக்கு வருவதில் சங்கடம் இருக்கலாம். இதனால் நியூசிலாந்து வீரர்களை உள்ளூர் வீரர்கள் போன்று பயன்படுத்திக் கொள்ளலாம். இதைப்பற்றி சிந்தித்தால் சில நியூசிலாந்து வீரர்கள் மேலும் வாய்ப்புகளை பெற்று நாடு முழுவதும் பிரபலம் அடைவார்கள்’’ என்றார்.