சையத் முஷ்டாக் அலி டிராபி சூப்பர் லீக்கில் இன்று நடைபெற்ற ஆட்டம் ஒன்றில் ‘பி’ பிரிவில் இடம் பிடித்துள்ள கர்நாடகா - பஞ்சாப் அணிகள் மோதின.
டாஸ் வென்ற கர்நாடகா பந்து வீச்சை தேர்வு செய்தது. அதன்படி பஞ்சாப் அணியின் ஷுப்மான் கில், அபிஷேக் ஷர்மா ஆகியோர் தொடக்க வீரர்களாக களம் இறங்கினர். ஷுப்மான் கில் 11 ரன்னில் ஆட்டமிழந்தார். அபிஷேக் ஷர்மா 5 ரன்னில் வெளியேறினார்.
அடுத்து வந்த கேப்டன் மந்தீப் சிங் 50 பந்தில் 76 ரன்கள் குவித்தார். குர்கீரத் சிங் 44 ரன்கள் அடிக்க பஞ்சாப் 20 ஓவரில் 6 விக்கெட் இழப்பிற்கு 163 ரன்கள் சேர்த்தது.
பின்னர் 164 ரன்கள் அடித்தால் வெற்றி என்ற இலக்குடன் கர்நாடகா அணியின் கேஎல் ராகுல், படிக்கல் ஆகியோர் தொடக்க வீரர்களாக களம் இறங்கினர். படிக்கல் 2 ரன்னிலும், அடுத்து வந்த கடம் 23 ரன்னிலும், கேப்டன் மணிஷ் பாண்டே 33 ரன்னிலும் ஆட்டமிழந்தனர்.
மறுபக்கம் விளையாடிய கேஎல் ராகுல் ஆட்டமிழக்காமல் 48 பந்தில் 7 பவுண்டரி, 4 சிக்சர்களுடன் 84 ரன்கள் விளாச கர்நாடகா 18 ஓவர்களில் 3 விக்கெட் இழப்பிற்கு 167 ரன்கள் எடுத்து 7 விக்கெட் வித்தியாசத்தில் அபார வெற்றி பெற்றது.
இந்த வெற்றியின் மூலம் ‘பி’ பிரிவில் கர்நாடகா மூன்று போட்டிகளில் விளையாடி மூன்றிலும் வெற்றி பெற்று முதல் இடம் வகிக்கிறது.
