search icon
என் மலர்tooltip icon

    செய்திகள்

    உலககோப்பை ஹாக்கி நாளை தொடக்கம்- 16 நாடுகள் பங்கேற்பு
    X

    உலககோப்பை ஹாக்கி நாளை தொடக்கம்- 16 நாடுகள் பங்கேற்பு

    16 நாடுகள் பங்கேற்கும் உலககோப்பை ஹாக்கி போட்டி ஒடிஷா தலைநகர் புவனேஷ்வரத்தில் நாளை தொடங்குகிறது. #HockeyWorldCup2018
    புவனேஸ்வர்:

    உலககோப்பை ஹாக்கி போட்டி 1971-ம் ஆண்டு அறிமுகம் செய்யப்பட்டது.

    பார்சிலோனாவில் (ஸ்பெயின்) நடந்த அந்தப் போட்டியில் பாகிஸ்தான் 1-0 என்ற கோல் கணக்கில் ஸ்பெயினை வீழ்த்தி சாம்பியன் பட்டம் பெற்றது.

    அதன்பிறகு 2 ஆண்டுகளுக்கு ஒரு முறையும், 1978-ல் இருந்து 4 ஆண்டுகளுக்கு ஒரு முறையும் உலககோப்பை ஹாக்கிப்போட்டி நடைபெற்று வருகிறது.

    கடைசியாக 2014-ம் ஆண்டு நெதர்லாந்தில் நடந்த போட்டியில் ஆஸ்திரேலியா சாம்பியன் பட்டம் பெற்றது.

    14-வது உலககோப்பை ஹாக்கிப்போட்டி ஒடிஷா தலைநகர் புவனேஷ்வரத்தில் நாளை (28-ந்தேதி) தொடங்குகிறது. டிசம்பர் 16-ந்தேதி வரை அங்குள்ள கலிங்கா ஸ்டேடியத்தில் இந்தப் போட்டி நடக்கிறது.

    இதில் 16 நாடுகள் பங்கேற்கின்றன. அவை 4 பிரிவாக பிரிக்கப்பட்டுள்ளன. ஒவ்வொரு பிரிவிலும் 4 நாடுகள் இடம் பெற்றுள்ளன. அதன் விவரம்:-

    அர்ஜென்டினா, ஸ்பெயின், பிரான்ஸ், நியூசிலாந்து (‘ஏ’ பிரிவு), நடப்பு சாம்பியன் ஆஸ்திரேலியா, இங்கிலாந்து, அயர்லாந்து, சீனா (‘பி’ பிரிவு), இந்தியா, பெல்ஜியம், தென்ஆப்பிரிக்கா, கனடா (‘சி’ பிரிவு), நெதர்லாந்து, ஜெர்மனி, பாகிஸ்தான், மலேசியா (‘டி’ பிரிவு).

    ஒவ்வொரு அணியும் தங்கள் பிரிவில் மற்ற அணிகளுடன் ஒரு முறை மோதும். ‘லீக்’ முடிவில் ஒவ்வொரு பிரிவிலும் முதல் இடத்தை பிடிக்கும் அணி நேரடியாக கால்இறுதிக்கு தகுதி பெறும். 4-வது இடத்தை பிடிக்கும் அணி வெளியேற்றப்படும்.

    ஒவ்வொரு பிரிவிலும் 2-வது, 3-வது இடங்களை பிடிக்கும் அணிகள் 2-வது சுற்றில் கிராஸ் ஓவர் முறையில் விளையாடும்.

    உதாரணத்துக்கு ‘ஏ’ பிரிவில் 2-வது இடத்தை பிடிக்கும் அணி ‘பி’ பிரிவில் 3-வது இடத்தை பிடிக்கும் அணியுடன் மோதும். இந்த 4 ஆட்டத்தின் முடிவில் 4 அணிகள் கால்இறுதிக்கு முன்னேறும்.

    வருகிற 9-ந்தேதியுடன் ‘லீக்’ ஆட்டம் முடிகிறது. 2-வது சுற்று 10 மற்றும் 11-ந்தேதிகளிலும், கால்இறுதி 12 மற்றும் 13-ந்தேதிகளிலும் நடைபெறுகிறது. 15-ந்தேதி அரை இறுதியும், 16-ந்தேதி இறுதிப் போட்டியும் நடக்கிறது.

    மன்பிரீத்சிங் தலைமையிலான இந்திய அணி 2-வது முறையாக உலக கோப்பையை வெல்லுமா? என்று ஹாக்கி ரசிகர்கள் ஆவலுடன் எதிர்பார்க்கின்றனர்.

    1975-ம் ஆண்டு இந்திய அணி உலககோப்பையை வென்றது. அதற்கு பிறகு எந்த தாக்கத்தையும் ஏற்படுத்தவில்லை. 5-வது இடத்தை பிடித்ததே சிறந்த நிலையாக இருந்தது. கடந்த உலககோப்பையில் 9-வது இடத்தை பிடித்தது.

    கால்இறுதிக்கு நேரடியாக நுழைவது இந்திய அணிக்கு சவாலாக இருக்காது என்றே எதிர்பார்க்கப்படுகிறது.

    உலககோப்பை ஹாக்கியில் இந்தியா மோதும் ‘லீக்’ ஆட்டம் வருமாறு:-

    நவ. 28: தென்ஆப்பிரிக்காவுடன் மோதல்.

    டிசம்பர். 2: பெல்ஜியத்துடன் மோதல்.

    டிசம்பர். 8: கனடாவுடன் மோதல் (இரவு 7 மணிக்கு இந்த ஆட்டங்கள் நடக்கிறது).

    உலககோப்பையில் விளையாடும் இந்திய ஹாக்கி அணி வீரர்கள் விவரம்:-

    கோல்கீப்பர்கள்: ஸ்ரீஜேஷ், கிருஷ்ணன், பகதூர் பதக்.

    பின்களம்: ஹர்மன்பிரீத் சிங், கோதாஜித், சுரேந்தர் குமார், வருண்குமார், பிரேந்திர லகரா, அமித் ரோகிதாஸ்.

    நடுகளம்: மன்பிரீத்சிங்(கேப்டன்), சுமித், நில்கந்தா சர்மா, சிங்லெசேனா.

    முன்களம்: தீப்ரீத்சிங், சிம்ரன் ஜித்சிங், மன்தீப் சிங், அக்‌ஷன்தீப்சிங்.

    நாளை நடைபெறும் தொடக்க ஆட்டங்களில் ‘சி’ பிரிவில் உள்ள பெல்ஜியம்- கனடா (மாலை 5 மணி), இந்தியா- தென்ஆப்பிரிக்கா (இரவு 7 மணி) அணிகள் மோதுகின்றன.

    இன்று மாலை உலக கோப்பை ஹாக்கிப் போட்டியின் தொடக்க விழா கோலாகலமாக நடக்கிறது.



    இதில் ஷாருக்கான், மாதுரிதீட்சித் ஆகியோரின் நடன நிகழ்ச்சியும், ஏ.ஆர்.ரகுமானின் இசை நிகழ்ச்சியும் நடக்கிறது.

    உலககோப்பை ஹாக்கிப் போட்டி இந்தியாவில் நடைபெறுவது 3-வது முறையாகும். இதற்கு முன்பு 1982-ல் மும்பையிலும், 2010-ல் டெல்லியிலும் நடைபெற்றது. #HockeyWorldCup2018
    Next Story
    ×