ஸ்வீடன் நாட்டின் கால்பந்து பந்து வீரர் ஸ்லாடன் இப்ராஹிமோவிச். 36 வயதாகும் இவருக்கு ரஷியாவில் நடைபெற்ற உலகக்கோப்பைக்கான ஸ்வீடன் அணியில் இடம் கிடைக்கவில்லை. தலைசிறந்த ஸ்ட்ரைக்கரான இவர் 2012-ம் ஆண்டு முதல் 2016-ம் ஆண்டு வரை பாரிஸ் செயின்ட் ஜெர்மைன் அணிக்காக விளையாடி 122 போட்டிகளில் 113 கோல் அடித்துள்ளார்.
2016-ம் ஆண்டு மான்செஸ்டர் அணிக்கு மாறினார். 2018 வரை மான்செஸ்டர் அணிக்காக 33 போட்டிகளில் விளையாடி 17 கோல் அடித்தார். இவரை அடிக்கடி காயம் துன்புறுத்தியதால் பெரும்பாலான நேரங்களில் ஓய்வில்தான் இருந்தார். இதனால் மான்செஸ்டர் அணி அவரை வைத்துக் கொள்ள விரும்பவில்லை. தற்போது அமெரிக்கா சென்று லா கிளாக்சி அணிக்காக விளையாடி வருகிறார்.
மான்செஸ்டர் யுனைடெட் அணிக்காக விளையாட விரும்பியது குறித்து இப்ராஹிமோவிச் நினைவு கூர்ந்துள்ளார். இதுகுறித்து அவர் கூறுகையில் ‘‘நான் மான்செஸ்டர் அணிக்காக விளையாட விரும்பினேன். அதற்காக சம்பளம் கூட வாங்க விரும்பவில்லை. அதை அவர்களே வைத்துக் கொள்ளட்டும் என்றேன்’’ என்று தெரிவித்துள்ளார்.
2016-ம் ஆண்டு பாரிஸ் செயின்ட் ஜெர்மைன் அணியுடனான ஒப்பந்தம் முடிவடைந்ததால் ப்ரீ டிரான்ஸ்பர் மூலம் மான்செஸ்டர் அணிக்கு மாறினார். 35 வயதான இவரை 2016-17 சீசனுக்கு மட்டுமே ஒப்பந்தம் செய்தது. சிறப்பான ஆட்டத்தை வெளிப்படுத்தியதால் 2017-18 சீசனிலும் ஒப்பந்தம் செய்தது குறிப்பிடத்தக்கது.
சுவீடன் அணிக்காக 2001-ம் ஆண்டு முதல் 2016 வரை 116 போட்டிகளில் விளையாடி 62 கோல் அடித்துள்ளார்.
