ஜிம்பாப்வேயில் நடைபெற்று வரும் முத்தரப்பு டி20 கிரிக்கெட் தொடரின் இன்றைய ஆட்டத்தில் பாகிஸ்தான் - ஆஸ்திரேலியா அணிகள் விளையாடி வருகின்றன. டாஸ் வென்ற ஆஸ்திரேலியா பந்து வீச்சு தேர்வு செய்தது. அதன்படி பாகிஸ்தானைச் சேர்ந்த முகமது ஹபீஸ், பகர் சமான் ஆகியோர் தொடக்க வீரர்களாக களம் இறங்கினார்கள். முதல் ஓவரிலேயே பாகிஸ்தானுக்கு பெரிய அதிர்ச்சி காத்திருந்தது. ஹபீஸ் 3 பந்தில் ரன்ஏதும் எடுக்காமல் ஆட்டமிழந்தார்.
அடுத்து வந்த ஹுசைன் தலத் 10 ரன்னிலும், மற்றொரு தொடக்க வீரர் பகர் சமான் 6 ரன்னிலும் வெளியேறினார்கள். அடுத்து வந்த சர்பராஸ் அஹமது 4 ரன்னிலும் வெளியேறினார்கள். இந்த நான்கு விக்கெட்டுக்களையும் வேகப்பந்து வீச்சாளர் ஸ்டேன்லேக் வீழ்த்தினார்.
ஸ்டேன்லேக் 4 ஓவரில் 8 ரன்கள் விட்டுக்கொடுத்து நான்கு விக்கெட்டுக்கள் வீழ்த்த பாகிஸ்தான் 24 ரன்கள் எடுப்பதற்குள் 4 விக்கெட்டுக்களை இழந்து திணறியது. அதன்பின் வந்த சோயிப் மாலிக் 13 ரன்னில் ரன்அவுட் ஆனார். 6-வது வீரர் ஆசிஃப் அலி 22 ரன்னும், 7-வது வீரர் சதாப் கான் 29 ரன்னும், 8-வது வீரர் பஹீம் அஷ்ரப் 21 ரன்களும் அடிக்க 19.5 ஓவர் வரை தாக்குப்பிடித்த பாகிஸ்தான் 116 ரன்களில் ஆல்அவுட் ஆனது.
ஸ்டேன்லேக் 4 விக்கெட்டும், அன்ட்ரிவ் டை 3 விக்கெட்டும் வீழ்த்தினார்கள். பின்னர் 117 ரன்கள் எடுத்தால் வெற்றி என்ற இலக்குடன் ஆஸ்திரேலியா பேட்டிங் செய்து வருகிறது.
