கர்நாடக சட்டசபை தேர்தல் முடிவுகள் லைவ் அப்டேட்ஸ்: ஆட்சியை பிடிக்கிறது காங்கிரஸ்

சிதாபூர் தொகுதியில் காங்கிரஸ் கட்சி வேட்பாளர் பிரியன்க் கார்கே பாஜக வேட்பாளர் ரத்தோட்-ஐ 13 ஆயிரத்து 640 வாக்குகள் வித்தியாசத்தில் வீழ்த்தினார்.

சிக்பல்லாபூர் தொகுதியில் போட்டியிட்ட காங்கிரஸ் கட்சி வேட்பாளர் பிரதீப் ஈஷ்வர், மாநில அமைச்சர் மற்றும் பாஜக வேட்பாளர் கே சுதாகரை 10 ஆயிரத்து 642 வாக்குகள் வித்தியாசத்தில் வீழ்த்தி வெற்றி பெற்றார்.

சாம்ராஜ்பெட் தொகுதியில் போட்டியிட்ட காங்கிரஸ் கட்சி வேட்பாளர் சமீர் அகமது கான் முன்னாள் காவல் துறை ஆணையரும், பாஜக வேட்பாளருமான பாஸ்கர் ராவை 53 ஆயிரத்து 953 வாக்குகள் வித்தியாசத்தில் வீழ்த்தி வெற்றி பெற்றார்.

கர்நாடகாவில் வெற்றி உறுதியான நிலையில், பெங்களூருவில் அமைந்திருக்கும் கர்நாடக மாநில காங்கிரஸ் கமிட்டி அலுவலகத்தின் வெளியே தொண்டர்கள் கொண்டாட்டத்தில் ஈடுபட்டு வருகின்றனர். 

கர்நாடக சட்டமன்ற தேர்தலில் காங்கிரஸ் கட்சி 103 தொகுதிகளில் வெற்றி பெற்றுள்ளது. மேலும் 33 இடங்களில் முன்னணியில் உள்ளது. பாஜக 50 இடங்களில் வெற்றி, 14 இடங்களில் முன்னணியில் உள்ளது. வாக்கு எண்ணிக்கை தொடர்ந்து நடைபெற்று வருகிறது.

கர்நாடக தேர்தலில் காங்கிரஸ் வெற்றி பெற இருக்கும் நிலையில், “தேர்தல் தோல்விக்கு நான் பொறுப்பேற்றுக் கொள்கிறேன்,” என்று கர்நாடக மாநிலத்துக்கான பாஜக தலைவர் நலின் குமார் கடீல் தெரிவித்தார்.

கர்நாடக தேர்தலில் பாஜக சார்பில் மல்லேஸ்வரம் தொகுதியில் போட்டியிட்டு வெற்றி பெற்ற சி.என். அஷ்வத்நாராயணன், “கர்நாடகாவில் இது எங்களுக்கு பின்னடைவு தான். மக்களின் தீர்ப்பை நாங்கள் ஏற்றுக் கொள்கிறோம். நாங்கள் மேலும் கடினமாக உழைத்து, மக்களின் நன்மதிப்பை பெறுவோம். 2024 தேர்தலில், 28 இடங்களிலும் எங்களது வேட்பாளர்கள் வெற்றி பெறுவதை உறுதிப்படுத்த விரும்புகிறோம்” என்று தெரிவித்தார்.