முகமது சமியிடம் மாதம் ரூ.10 லட்சம் ஜீவனாம்சம் கேட்ட மனைவியின் மனு தள்ளுபடி

கொல்கத்தா:

இந்திய கிரிக்கெட் அணியின் முன்னணி வேகப்பந்து வீச்சாளர்களில் ஒருவர் முகமது சமி. இவர் மாடல் அழகியும், கொல்கத்தா அணியின் உற்சாகமளிக்கும் நடனகலைஞரான ஹசின் ஜஹான் என்பவரை திருமணம் செய்துகொண்டார். திருமணம் ஆன சில ஆண்டுகளிலேயே இருவருக்கும் கருத்து வேறுபாடு ஏற்பட்டதாக தெரிகிறது.

சில மாதங்களுக்கு முன்பு, ஹசின் ஜஹான், தனது கணவருக்கு பல பெண்களுடன் தொடர்பு இருப்பதாகவும், தன்னை கொடுமை செய்து கொலை செய்ய முயற்சிப்பதாகவும் புகார் அளித்து இருந்தார். அதோடு, முகமது சமி கிரிக்கெட் சூதாட்டத்தில் ஈடுபட்டதாகவும் குற்றம்சாட்டியிருந்தார். இந்த புகாரின் அடிப்படையில் போலீசார் வழக்குப்பதிவு செய்திருந்தனர்.

இதையடுத்து, முகமது சமி, வருடத்துக்கு 10 கோடி ரூபாய் சம்பளம் பெருவதாகவும், அதனால் தனக்கும் தன் மகளுக்கும் மாதம் 10 லட்ச ரூபாய் ஜீவனாம்சம் அளிக்க வேண்டும் எனவும் ஹசின் ஜஹான் கோரியிருந்தார். இந்த மனுவை இன்று விசாரித்த அலிபோர் மாவட்ட நீதிமன்றம், ஹசின் ஜஹானின் மனுவை தள்ளுபடி செய்தது.

மேலும், மாதந்தோறும் அவர்களது மகளின் பராமரிப்புக்காக மட்டும் 80 ஆயிரம் ரூபாய் பணம் அளிக்க வேண்டும் என முகமது சமிக்கு நீதிமன்றம் உத்தரவிட்டுள்ளது. #MohammadShami #HasinJahan