பேரணாம்பட்டு:
பேரணாம்பட்டு அருகே அரவட்லா மலை பகுதி பாஸ்மார் பெண்டா மலை கிராமத்தைச் சேர்ந்தவர்.
வள்ளியம்மாள் கடந்த 29 ந் தேதியன்று தலையில் பாறாங்கல்லால் தாக்கி கொடூரமாக கொலை செய்யப்பட்டு கிடந்தார். இது சம்மந்தமாக வேலூர் மாவட்ட போலீஸ் சூப்பிரண்டு ராஜேஷ் கண்ணன், குடியாத்தம் டி.எஸ்.பி. ராமமூர்த்தி ஆகியோர் நேரில் சென்று விசாரணை நடத்தினர்.
திருவண்ணாமலை யிலிருந்து மோப்ப நாய் வீரா வரவழைக்கப்பட்டு அதே கிராமத்திலுள்ள பாண்டு என்பவர் வீட்டையே சுற்றி சுற்றி வந்தது. இதனைத் தொடர்ந்து பேரணாம்பட்டு போலீஸ் இன்ஸ்பெக்டர் ராஜன் பாபு மற்றும் போலீசார் தீவிர விசாரணை நடத்தினர்.
போலீசார் சந்தேகத்தின் பேரில் சின்னையன், பாண்டு ஆகிய 2 பேரையும் பிடித்து விசாரணை நடத்தியதில் வள்ளியம்மாளுக்கு மது அருந்தும் பழக்கம் இருந்து வந்ததாகவும்,மேலும் சின்னையனின் அக்கா ராஜேஸ்வரி (57) என்பவருக்கு வள்ளியம்மாள் ரூ.15 ஆயிரம் வட்டிக்கு பணம் கொடுத்து உள்ளார்.
சம்பவம் நடந்த அன்று வள்ளியம்மாள் ராஜேஸ்வரியிடம் கொடுத்த பணத்தை திருப்பி கேட்டு தகராறில் ஈடுபட்டார். அப்போது அங்கு இருந்த சின்னையன், பாண்டு ஆகியோர் வள்ளியம்மாளிடம் ஏன் பணம் கேட்டு சண்டை போடுகிறாய் காலையில் வந்து பேசுமாறு கூறினார்.
இதனால் ஆத்திரமடைந்த வள்ளியம்மாள் சின்னையனை ஆபாசமான வார்த்தைகளால் திட்டியதாக கூறப்படுகிறது. இதனால் ஆத்திரமடைந்த சின்னையனும் பாண்டுவும் வள்ளியம்மாளை பின் தொடர்ந்து சென்று தாக்கினார். அப்போது வள்ளியம்மாள் தலையில் பாறாங்கல்லை போட்டு கொலை செய்தனர்.
பின்னர் ராஜேஸ்வரியிடம் சென்று வள்ளியம்மாளை பாறாங்கல்லால் தாக்கி கொலை செய்ததை கூறியுள்ளனர். இதனையடுத்து சின்னையன், பாண்டு, ராஜேஸ்வரி ஆகிய 3 பேரை போலீசார் கைது செய்தனர்.
