சிவகங்கை

திருப்பத்தூர்:

சிவகங்கை மாவட்டம், திருப்பத்தூர் அருகே உள்ள தளக்காவூர் கிராமத்தில் கருப்பாயி பாலம் உள்ளது. இந்த பாலத்தின் கீழ் இன்று காலை, சுமார் 30 வயது மதிக்கத்தக்க வாலிபர் ரத்த வெள்ளத்தில் பிணமாக கிடந்தார்.

இது குறித்து அந்த வழியாக சென்ற பொதுமக்கள் நாச்சியார்புரம் போலீசாருக்கு தகவல் தெரிவித்தனர். போலீசார் சம்பவ இடத்திற்கு விரைந்து வந்து வாலிபரின் உடலை கைப்பற்றி பிரேத பரிசோதனைக்காக திருப்பத்தூர் அரசு ஆஸ்பத்திரிக்கு அனுப்பி வைத்தனர்.

பிணமாக கிடந்தவர் உடலில் 13 இடங்களில் அரிவாள் வெட்டு இருந்தது. அவரை மர்ம ஆசாமிகள் அரிவாளால் வெட்டி கொலை செய்துள்ளனர். கொலையானவர் யார்? எந்த ஊரைச் சேர்ந்தவர்? எதற்காக கொலை செய்யப்பட்டார் என போலீசார் விசாரணை நடத்தி வருகின்றனர். மேலும் கொலையாளிகளையும் தேடி வருகின்றனர்.

சிவகங்கை:

சிங்கம்புணரி அருகே உள்ள சிவபொறிபட்டி கிராமத்தை சேர்ந்தவர் செல்வகுமார், விவசாயி. இவரது மனைவி ரெவினேஸ்வரி. இவர்களது மகள் சத்யா. இவர் பிளஸ்-2 படித்துவிட்டு வீட்டில் பெற்றோருக்கு உதவியாக இருந்து வந்தார்.

இந்நிலையில் சம்பவத்தன்று வேலை நிமித்தமாக சிங்கம்புணரிக்கு செல்வதாக கூறிவிட்டுச் சென்ற சத்யா பின்னர் நீண்ட நேரமாகியும் வீடு திரும்ப வில்லை.

இதனால் பதட்டமடைந்த அவரது பெற்றோர், தங்களது மகளை தோழிகள், உறவினர்கள் வீடுகளில் தேடிப்பார்த்தனர். ஆனால் எங்கு தேடியும் அவர் கிடைக்கவில்லை.

இதுகுறித்து ரெவினேஸ்வரி, சிங்கம்புணரி போலீசில் புகார் செய்தார். இன்ஸ்பெக்டர் முருகதாசன் வழக்குப்பதிவு செய்து மாயமான சத்யாவை தேடி வருகிறார்.

மானாமதுரை:

சிவகங்கை மாவட்டம் மானாமதுரை நகர் பகுதியில் சுர்தாபுரம் கடைவீதி, மாரியம்மன் கோவில் தெரு, பழைய தபால் ஆபிஸ் தெரு, பட்டறை தெரு, குறிஞ்சி நகர் ஆகிய பகுதிகளில் சாலைகள் பயன்படுத்த முடியாத நிலை இருந்தது.

இப்பகுதி மக்கள் புதிய சாலை அமைக்க வேண்டும் என மானாமதுரை தொகுதி எம்.எல்.ஏ. மாரியப்பன் கென்னடியிடம் வலியுறுத்தினார்கள். அதைத் தொடர்ந்து பொதுமக்கள் அதிகம் பயன்படுத்தும் நகர் பகுதியில் உடனடியாக சாலை அமைக்க வேண்டும் என பேரூராட்சி அதிகாரியிடம் வலியுறுத்தினார்.

அதைத்தொடர்ந்து மானாமதுரை நகர் பகுதியில் பேரூராட்சி நிர்வாகம் சார்பில் ரூ. 1 கோடியே 41 லட்சம் செலவில் புதிய தார்சாலை அமைக்க நிதி ஒதுக்கப்பட்டு சாலை அமைக்கும் பணியும் தொடங்கியது. பொதுமக்கள் வசதிக்காக சிவகங்கை, பெரம்பலூர், பாராளுமன்ற தொகுதி மேம்பாட்டு நிதியில் இருந்து உயர் மின் கோபுர விளக்குகள் அமைக்கப்பட்டு உள்ளது என்றும் எம்.எல்.ஏ. மாரியப்பன் தெரிவித்தார்.

காரைக்குடி:

பா.ஜ.க. தேசிய செயலாளர் எச்.ராஜாவை கண்டித்து காரைக்குடியில் அவரது உருவ பொம்மையை எரிக்க முயன்ற காங்கிரசாரை போலீசார் கைது செய்தனர்.

முன்னதாக எச். ராஜாவை கைது செய்ய வலியுறுத்தி காங்கிரஸ் மாவட்டத்தலைவர் சத்திய மூர்த்தி தலைமையில் காரைக்குடி வடக்கு காவல் நிலைய ஆய்வாளர் மணி வண்ணணிடம் புகார் மனு அளித்தனர். பின்னர் கோ‌ஷங்கள் எழுப்பியபடி ராஜீவ்காந்தி சிலை அருகே ஆர்ப்பாட்டத்தில் ஈடுபட்டனர்.

மேலும் எச். ராஜாவின் உருவ பொம்மையை எரிக்க முயன்றபோது டி.எஸ்.பி. கார்த்திகேயன் தலைமையிலான போலீசார் கைது செய்து உருவ பொம்மையை கைப்பற்றினர்.

மாவட்டத்தலைவர் சத்தியமூர்த்தி, சங்கராபுரம் முன்னாள் ஊராட்சி மன்றத்தலைவர் மாங்குடி, நகரத்தலைவர் பாண்டி, முன்னாள் மாவட்டத் தலைவர் ராஜரத்தினம், கோவிலூர் முன்னாள் ஊராட்சி மன்றத்தலைவர் அழகப்பன், பழனியப்பன், குமரேசன், முன்னாள் கவுன்சிலர் மெய்யர், வக்கீல் சித்திக் உள்பட 70 பேரை போலீசார் கைது செய்தனர்.

காரைக்குடி:

சிவகங்கை மாவட்ட தமிழ்மாநில காங்கிரசின் செயல்வீரர்கள் மற்றும் நிர்வாகிகள் கூட்டம் காரைக்குடி சத்குரு ஞானாளந்தா மகாலில் நடைபெற்றது. இதில் த.மா.கா. தலைவர் ஜி.கே.வாசன் கலந்து கொண்டு பேசினார்.

முன்னதாக அவர் நிருபர்களிடம் கூறியதாவது:-

வருகிற உள்ளாட்சி தேர்தலில் அதிக இடங்களில் மனுத்தாக்கல் செய்து அதிக இடங்களில் வெற்றி பெறுவதே எங்கள் இலக்கு ஆகும். மேலும் எங்களுக்கு மதிப்பளிக்கின்ற அதிக இடங்களை தருகின்ற எங்களின் பலம் அறிந்தவர்களோடு கூட்டணி அமைத்து தேர்தலில் சாதிக்கவும் தயாராக உள்ளோம்.

சமீப காலமாக அரசியலில் நடைபெறும் மாற்றங்களை, மக்கள் பார்த்துக் கொண்டு வருவதால் விழிப்புணர்வுடன் இருக்கிறார்கள். தற்போது விவசாயிகளின் வாழ்வாதாரம் பெரிய வீழ்ச்சியை நோக்கி சென்று கொண்டிருக்கிறது.

மத்திய, மாநில அரசுகள் வறட்சி நிவாரண தொகையை உடனடியாக வழங்கி, விவசாய கடன்களை ரத்து செய்ய வேண்டும். ஹைட்ரோ கார்பன் திட்டத்தில் நம்பிக்கை துரோகம் நடந்துள்ளது. மக்கள் விரும்பாத திட்டத்தை அவர்கள் மீது திணிப்பது வன்மையாக கண்டிக்கத்தக்கது.

சிவகங்கை மாவட்டம் உள்பட தமிழகம் முழுவதும் குடிநீர் தட்டுப்பாட்டை போக்க போர்க்கால நடவடிக்கையை அரசு மேற்கொள்ள வேண்டும்.

இவ்வாறு அவர் கூறினார்.

கூட்டத்தில் மாவட்டத் தலைவர் பாலசுப்பிர மணியன், மாநில பொதுச்செயலாளர் சுப. உடையப்பன், மாநில செயலாளர்கள் துரை கருணாநிதி, அழகேசன், ராஜலிங்கம், சந்தியாகு, மாநில துணைத்தலைவர் கோவை தங்கம், பொதுச் செயலாளர் விடியல் சேகர், மாவட்ட பொறுப்பாளர் மகாதேவன், தலைமைக்கழக பேச்சாளர் கரிகாலன், மாவட்ட துணைத்தலைவர்கள் அசோகன், ராஜேந்திரன், நகரத்தலைவர் செல்வரங்கன், முத்துவேல், மாநில செயற்குழு உறுப்பினர் ஜெகதீஷ், மாநில இளைஞரணி இணைச் செயலாளர் சோமேஷ் மற்றும் பலர் கலந்து கொண்டனர். சிவகங்கை மாவட்ட இளைஞரணி தலைவர் சார்லஸ் ஜான் கென்னடி நன்றி கூறினார்.

சிவகங்கை:

சிவகங்கை நகரைச் சேர்ந்தவர் அஜ்மல்ராஜ் (வயது 30). தனியார் புகைப்பட கேமிராமேன். இவரது மனைவி ராதிகா என்ற ருஷ்யா (27). இவர்கள், கடந்த 2011-ம் ஆண்டு காதலித்து திருமணம் செய்தனர்.

இந்த நிலையில் குழந்தைகள் இல்லாததால், ருஷ்யா மனவேதனையில் இருந்து வந்தார். சம்பவத்தன்று அஜ்மல்ராஜ் வெளியே சென்று விட்டார்.

இதனால் வீட்டில் தனியாக இருந்த ருஷ்யா வாழ்க்கையில் வெறுப்படைந்து தூக்குப்போட்டு தற்கொலை செய்தார். இது குறித்து அவரது தாய் பூமயில், சிவகங்கை நகர் போலீசில் புகார் செய்தார்.

இன்ஸ்பெக்டர் மோகன் வழக்குப்பதிவு செய்து விசாரணை நடத்தி வருகிறார். ருஷ்யாவுக்கு திருமணமாகி 6 ஆண்டுகளே ஆவதால், கோட்டாட்சியர் விசாரணையும் நடக்கிறது.

மானாமதுரை:

மானாமதுரை-சிவகங்கை ரோட்டில் உள்ள தயாபுரம் முத்துமாரியம்மன் கோவிலில் பங்குனி பொங்கல் விழா 10 நாட்கள் நடந்தது. தினமும் அம்மனுக்கு 16 வகையான அபிசேகம் செய்து சிறப்பு அலங்காரம் செய்யப்பட்டது.

முக்கிய விழாவான பூக்குழி இறங்கும் நிகழ்ச்சியும் நடந்தது. இதில் ஏராளமான பக்தர்கள் டிரஸ்டி சுப்பிரமணியன் தலைமையில் தீச்சட்டி எடுத்து வைகை ஆற்றில் இருந்து ஊர்வலமாக வந்தனர்.

பின்னர் கோவில் முன்பு உள்ள அக்கினி குண்டத்தில் தீ மிதித்து நேர்த்திக்கடன் செலுத்தினார்கள்.

ரெயில் நிலையம் எதிரே உள்ள ஆதிமுத்து மாரியம்மன் கோவிலில் நடந்த தீமிதி விழாவில் ஏராளமான பக்தர்கள் பூசரகம், அலகு குத்திக் கொண்டு தீ மிதித்து வழிபாடு செய்தனர்.

சிவகங்கை:

சிவகங்கை அருகே உள்ளது. பனையூர். இந்த பகுதியை சேர்ந்தவர் பாண்டிதுரை (வயது 48). அ.தி.மு.க. தொண்டர்.

சென்னை ஆர்.கே.நகர் தொகுதியில் இரட்டை இலை சின்னம் முடக்கப்பட்டது. இந்த தகவல் அறிந்ததும் பாண்டிதுரை மனவேதனை அடைந்து வந்தார். அவர் யாரிடமும் பேசாமல் இருந்து வந்தார். இந்த நிலையில் அவர் வி‌ஷம் குடித்து வீட்டில் மயங்கி கிடந்தார்.

அவரை மீட்டு சிவகங்கை அரசு ஆஸ்பத்திரியில் சேர்ந்தனர் அங்கு சிகிச்சை பலன் அளிக்காமல் பாண்டித்துரை பரிதாபமாக இறந்தார்.

இதுகுறித்து சிவகங்கை தாலுகா போலீசார் வழக்குப்பதிவு செய்து விசாரணை நடத்தி வருகிறார்கள்.