நாகப்பட்டினம்

தரங்கம்பாடி:

நாகை மாவட்டம் பொறையாறு போலீஸ் இன்ஸ்பெக்டர் முருகவேல் நேற்று இரவு திருக்கடையூர் மெயின் ரோட்டில் ரோந்து பணியில் ஈடுபட்டிருந்தார். அப்போது அந்த வழியாக வந்த மோட்டார் சைக்கிளை சோதனை செய்தனர். இதில் புதுச்சேரி மாநிலம் காரைக்கால் மாவட்டத்தில் இருந்து 515 மதுபாட்டில்களை கடத்தி வருவது தெரியவந்தது.

இதையடுத்து போலீசார் அந்த நபரிடம் விசாரணை நடத்தியதில் சீர்காழி தாலுக்கா புதுப்பட்டினத்தை சேர்ந்த சோமு மகன் அய்யப்பன் (வயது 30) என்பது தெரியவந்தது. இன்ஸ்பெக்டர் முருகவேல் மதுபாட்டில்களையும், மோட்டார் சைக்கிளையும் பறிமுதல் செய்து அய்யப்பனை கைது செய்தனர்.

வேதாரண்யம்:

தமிழகத்தில் நேற்று பரவலாக மழை பெய்தது. தஞ்சை திருவையாறு, கும்பகோணம் உள்ளிட்ட பகுதிகளிலும் மழை பெய்தது. நாகை மாவட்டம் வேதாரண்யத்தில் நேற்று மதியம் முதல் இன்று காலை வரை விட்டு விட்டு மழை பெய்தது.

இதனால் உப்பு உற்பத்தி பாதிக்கப்பட்டு உள்ளது. வேதாரண்யத்தில் இன்று காலை 8 மணி வரை 50.8 மி.மீ. மழை பதிவாகி உள்ளது.நாகையிலும் நேற்று மதியம் முதல் இன்று காலை வரை மழை பெய்தது.

வேதாரண்யம்:

வேதாரண்யத்தை அடுத்த தென்னம்புலம் கிராமத்தைச் சேர்ந்தவர் சுப்பிரமணியன் (வயது 65). இவர் குரவப்புலத்திற்கு கூலி வேலைக்கு சென்று சவுக்கு மரம் வெட்டிவிட்டு சைக்கிளில் வீடு திரும்பினார்.

குரவப்புலம் கடைவீதியில் சென்றபோது வேதாரண்யத்திலிருந்து ராஜப்பா மகன் ஹரிகரன் (22) ஓட்டி வந்த மோட்டார் சைக்கிள் மோதியதில் சுப்பிரமணியன் படுகாயமடைந்தார். அவர் வேதாரண்யம் அரசு மருத்துவமனையில் சேர்க்கப்பட்டு சிகிச்சை பெற்று வருகிறார்.

வேதாரண்யத்தை அடுத்த ஆதனூர் கிராமத்தைச் சேர்ந்தவர் அண்ணாதுரை (60). இவர் வேதாரண்யம்- கோடியக்கரை சாலையில் அகஸ்தியன்பள்ளி அய்யனார் கோவில் வளைவில் இருந்து அன்னதான கூடத்திற்கு சாப்பிட நடந்து சென்றபோது அகஸ்தியன்பள்ளி சக்திவேல் (26) ஓட்டிச் சென்ற மோட்டார் சைக்கிள் மோதியது.

இதில் படுகாயமடைந்த அண்ணாதுரையை மீட்டு வேதாரண்யம் அரசு மருத்துவமனையில் சேர்த்தனர். அவர் சிகிச்சை பெற்று வருகிறார்.

வேதாரண்யத்தை சேர்ந்த சபரிநாதனும் (42), அவரது நண்பர் கோவிந்தனும் தோப்புத்துறை சென்றுவிட்டு மோட்டார் சைக்கிளில் வீட்டிற்கு திரும்பினர். குருகுலம் எதிரே வந்தபோது தோப்புத்துறையை சேர்ந்த தனுஷ்கோடி (32) என்பவர் ஓட்டி வந்த மோட்டார் சைக்கிள் இவர்கள் மீது மோதியதில் மூவரும் படுகாயமடைந்தனர்.

இவர்களை மீட்டு வேதாரண்யம் அரசு மருத்துவமனையில் சேர்ந்து சிகிச்சை பெற்று வருகிறார்கள். இந்த விபத்து குறித்து வேதாரண்யம் போலீசார் வழக்கு பதிவுசெய்து விசாரணை செய்து வருகிறார்கள்.

சீர்காழி:

சீர்காழி திருத்தாள முடையார் கோவில் தெருவை சேர்ந்தவர் சேகர் (வயது 60). இவரது பேரன் கிசாந்த் நேற்று வீட்டின் முன்பு விளையாடி கொண்டிருந்தான். அப்போது அவன் அணிந்திருந்த 1 பவுன் தங்கசெயினை மர்ம நபர் பறித்து சென்று விட்டான். இதுபற்றி சேகர் சீர்காழி போலீசில் புகார் செய்தார்.

அதன்பேரில் இன்ஸ்பெக்டர் அழகுதுரை, குற்றப்பிரிவு சப்-இன்ஸ்பெக்டர்கள் வில்சன், வசந்த் ஆகியோர் வழக்குப்பதிவு செய்து விசாரணை நடத்தினர். இதில் அந்த வழியாக சென்ற சீர்காழி இரணியன் நகரை சேர்ந்த ஆட்டோ டிரைவர் முபாரக் அலி (23) என்பவர் குழந்தையிடமிருந்து செயினை பறித்து சென்றது தெரியவந்தது. அவரை போலீசார் கைது செய்து நகையை மீட்டனர். பின்னர் அவர் கோர்ட்டில் ஆஜர்படுத்தப்பட்டு காவலில் வைக்கப்பட்டார்.

மயிலாடுதுறை:

நாகை மாவட்டம் மயிலாடுதுறை கூறைநாடு எடத் தெருவை சேர்ந்தவர் நாகராஜன். இவரது மனைவி லெட்சுமி (65). கணவர் இறந்து விட்டதால் தனியாக வசித்து வந்தார்.

இவர் கடந்த 4 மாதத்திற்கு முன்பு மூட்டு அறுவை சிகிச்சை செய்து இருந்தார். ஆனால் அவருக்கு யாரும் உதவி செய்யவில்லை. அதனால் மனம் உடைந்து காணப்பட்டார். இன்று அதிகாலை லெட்சுமி தனது வீட்டின் பின்புறத்தில் உடலில் மண்எண்ணை ஊற்றி தீ வைத்து கொண்டார். இதில் உடல் கருகி சம்பவ இடத்திலே இறந்தார்.

இது குறித்து மயிலாடுதுறை போலீசில் புகார் செய்யப்பட்டது. இன்ஸ்பெக்டர் மகாதேவன் சம்பவ இடத்திற்கு சென்று லெட்சுமி பிணத்தை பிரேத பரிசோதனைக்காக மயிலாடுதுறை அரசு ஆஸ்பத்திரிக்கு அனுப்பி வைத்தார்.

இது தொடர்பாக போலீசார் விசாரணை நடத்தி வருகிறார்கள்.

வேதாரண்யம்:

வேதாரண்யம் பஸ் நிலையத்தின் அருகே உள்ள அம்பேத்கர் சிலையை வேதாரண்யேஸ்வர சுவாமி கோவில் தேரோட்டத்திற்கு இடையூறாக உள்ளது என்று கூறி அகற்றுவதை கண்டித்து மார்க்சிஸ்ட் கம்னியூஸ்டு கட்சியினர், தலித் கூட்டமைப்பினர் தாலுகா அலுவலகம் முன்பு ஆர்ப்பாட்டம் நடத்தினர்.

ஆர்ப்பாட்டத்திற்கு நாகை முன்னாள் எம்.எல்.ஏ மாலி தலைமை தாங்கினார். ஆர்ப்பாட்டத்தில் மாவட்டக்குழு உறுப்பினர் கோவை சுப்பிரமணியன் ஒன்றியச் செயலாளர் செங்குட்டுவன் மற்றும் தலித் கூட்டமைப்பினர் கலந்துகொண்டனர். ஆர்ப்பாட்டத்தில் கோரிக்கைளை வலியுறுத்தி முழக்கங்களை எழுப்பினர். முன்னதாக தமிழக காங்கிரஸ் கட்சி சிறுபான்மை பிரிவு மாநிலத்தலைவர் செல்வபெருந்தகை பஸ் நிலையம் அருகே உள்ள அம்பேத்கர் சிலையை அகற்றக்கூடாது என தெரிவித்தார்.

மத்திய, மாநில அரசுகளின் மக்கள் விரோத கொள்கைகளை கண்டித்தும், மாற்றுக் கொள்கையை முன் வைத்தும் மார்க்சிஸ்ட் கம்யூனிஸ்ட் கட்சி சார்பில் தெருமுனைப் பிரச்சாரம் நடைபெற்றது. சேதுபாவாசத்திரம் ஒன்றியம் ரெட்டவயலில் நடைபெற்ற தெருமுனைப் பிரச்சாரக் கூட்டத்திற்கு, மாவட்டக்குழு உறுப்பினர் கருப்பையா தலைமை வகித்தார். நீலமேகன் வரவேற்றார்.

மாவட்டச் செயற்குழு உறுப்பினர் ஆர்.சி.பழனிவேலு, சேதுபாவாசத்திரம் ஒன்றியச் செயலாளர் ஆர்.எஸ்.வேலுச்சாமி ஆகியோர் சிறப்புரையாற்றினர். கூட்டத்தில் கருப்பையா, ஜெகநாதன், மாசிலாமணி, சேகர், ஆதிநாராயணன், இளங்கோ உள்ளிட்ட பலர் கலந்து கொண்டனர். மந்திரிப்பட்டினம், சேதுபாவாசத்திரம், குருவிக்கரம்பை ஆகிய இடங்களிலும் தெருமுனைப்பிரசாரம் நடைபெற்றது.

மயிலாடுதுறை:

நாகை மாவட்டம் மயிலாடுதுறை அருகே உள்ள லெட்சுபுரத்தில் வசித்து வருபவர் நடராஜன். ஓய்வு பெற்ற கல்லூரி பேராசிரியர்.

இவரது மனைவி லலிதா. நேற்று இரவு இவர்கள் வீட்டில் தூங்கி கொண்டிருந்தனர்.நள்ளிரவு 1 மணியளவில் கொள்ளை கும்பல் 3 பேர் அங்கு வந்தனர்.

அவர்கள் முகமூடி அணிந்திருந்தனர். நடராஜன் வீட்டின் கிரில் கேட் மற்றும் கதவின் பூட்டை உடைத்து கொண்டு அக்கும்பல் உள்ளே நுழைந்தது.

அப்போது நடராஜன் பாத்ரூமில் இருந்தார். அதன் கதவை வெளிப்பக்கம் பூட்டிய கொள்ளை கும்பல் லலிதா படுத்திருந்த அறைக்கு சென்று அவரை அறைந்து எழுப்பினர்.

கொள்ளையர்களை பார்த்த அவர் சத்தம் போட்டார். உடனே அவரை உருட்டுக் கட்டையால் தாக்கினர்.இந்த சமயத்தில் நடராஜன் பாத்ரூம் கதவை உடைத்து கொண்டு வெளியே வந்தார்.அவரை மிரட்டி உட்கார வைத்தனர்.

பின்னர் அறையின் பூட்டை உடைத்து கொண்டு உள்ளே நுழைந்த கொள்ளையர்கள் அங்கு பீரோவில் வைக்கப்பட்டிருந்த 45 பவுன் தங்க நகை, 20 ஆயிரம் பணம் ஆகியவற்றை கொள்ளையடித்து விட்டு தப்பி சென்று விட்டனர்.

கொள்ளையர்களிடம் நகையை பறிகொடுத்த நடராஜன் இது குறித்து மயிலாடுதுறை போலீசில் புகார் செய்தார்.

டி.எஸ்.பி.(பொறுப்பு) சேகர், இன்ஸ்பெக்டர் மகாதேவன் மற்றும் போலீசார் சம்பவ இடத்திற்கு வந்து விசாரணை நடத்தினர். கைரேகை நிபுணர்களும் வந்து தடயங்களை சேகரித்தனர்.

பேராசிரியர் வீட்டில் நடைபெற்ற முகமூடி கொள்ளை சம்பவம் அப்பகுதியில் பரபரப்பை ஏற்படுத்தி உள்ளது.