காஞ்சிபுரம்

ஸ்ரீபெரும்புதூர்:

ஸ்ரீபெரும்புதூரில் இருங்காட்டுகோட்டை சிப்காட், மாடம்பாக்கம் சிப்காட், ஒரகடம் சிப்காட் உள்ளிட்ட பகுதிகளில் ஆயிரத்துக்கும் மேற்பட்ட தொழிற்சாலைகள் உள்ளன.

இதில் தமிழ்நாட்டை சேர்ந்தர்களை தவிர ஒப்பந்த அடிப்படையில் வடமாநிலத்தை சேர்ந்தவர்கள் ஏராளமானோர் பணி செய்து வருகிறார்கள்.

ஸ்ரீபெரும்புதூர் மற்றும் சுற்று வட்டாரத்தில் குற்ற சம்பவங்கள் நிகழும் போது, வடமாநிலத்தார் கொலை செய்யப்பட்டாலோ அல்லது தீ விபத்தில் இறந்து போனாலோ அவர்களை அடையாளம் காண்பதில் போலீசாருக்கு சிக்கல் ஏற்படுகிறது.

இதனை தடுக்க ஸ்ரீபெரும்புதூர் டி.எஸ்.பி. சிலம்பரசன் தலைமையில் கம்பெனி நிர்வாகத்தினரிடம் கலந் தாய்வு கூட்டம் நடைபெற்றது.

கம்பெனி நிர்வாகத்தினர். பணி செய்யும் வடமாநில ஊழியர்களிடம் உரிய அடையாள ஆவணம் பெறுதல் வேண்டும். கம்பெனியில் அனைத்து பகுதியிலும் கண்காணிப்பு கேமிரா கட்டாயம் பொருத்த வேண்டும்.

குற்றம் செய்த ஊழியர்கள் பணி நீக்கம் செய்யப்பட்டால், இதுபற்றி கம்பெனி நிர்வாகத்தில் போலீசுக்கு தகவல் தெரிவிக்க வேண்டும்.

இவ்வாறு அவர் கூறினார்.

கூட்டத்தில் இன்ஸ்பெக்டர்கள் கண்ணய்யன், குமார், அசோகன் மற்றும் கம்பெனி நிர்வாகிகள் கலந்து கொண்டனர்.

தாம்பரம்:

தமிழகத்தில் அங்கீகாரம் பெறாத மனை பிரிவுகளை பதிவு செய்வதற்கு கோர்ட்டு தடைவிதித்துள்ளது. இந்த நிலையில் ராணுவத்திற்கு சொந்தமான இடத்தையே ஒரு பெண் பட்டா போட்டு விற்று இருப்பது தெரிய வந்துள்ளது.

செய்யூரை சேர்ந்தவர் கார்த்திகேயன். திருவண்ணாமலையில் தையல் எந்திர நிறுவனம் நடத்தி வருகிறார். இவர் கடந்த சில ஆண்டுகளுக்கு முன்பு பல்லாவரம் கண்டோன்மெண்ட் பகுதியை சேர்ந்த ஜோதி என்ற பெண்ணிடம் ஒரு வீட்டு மனையை விலைக்கு வாங்கியுள்ளார்.

அந்த மனைக்கு ரூ.50 லட்சம் விலை பேசப்பட்டு ரூ.39 லட்சம் முன்பணமாக கொடுத்துள்ளார். பின்னர் அந்த இடத்தை பத்திர பதிவு செய்த போதுதான் அந்த இடம் ராணுவத்திற்கு சொந்தமானது என்பது தெரிய வந்துள்ளது. போலியாக பட்டா தயாரித்து அந்த இடத்தை ஜோதி விற்பனை செய்துள்ளார்.

இதை அறிந்ததும் கார்த்திகேயன் தான் கொடுத்து ரூ.39 லட்சத்தை திருப்பி தரும்படி கேட்டுள்ளார்.

பணத்தை கொடுக்க மறுத்த ஜோதி அவரது கூட்டாளிகளான குட்டி என்ற ரமேஷ் உள்பட சிலருடன் சென்று கார்த்திகேயனை கொன்று விடுவதாக மிரட்டி இருக்கிறார்.

இதுபற்றி கார்த்திகேயன் பல்லாவரம் போலீசில் புகார் செய்தார். போலீசார் விசாரணை நடத்தி குட்டி என்ற ரமேசை கைது செய்தனர். ஜோதி உள்பட 3 பேரையும் தேடி வருகின்றனர்.

கைது செய்யப்பட்டுள்ள குட்டி முன்னாள் கவுன்சிலர் என்பது குறிப்பிடத்தக்கது.

ஆலந்தூர்:

பள்ளிக்கரணையை சேர்ந்தவர் மோகன் (வயது 40). எலக்ட்ரீசியன். இன்று காலை ஆதம்பாக்கத்திற்கு பணிக்கு சென்றார்.

கக்கன் நகர் மெயின் ரோட்டை கடக்க முயன்ற போது கிண்டி நோக்கி சென்ற டிப்பர் லாரி திடீரென மோகன் மீது மோதியது.

இதில் சம்பவ இடத்திலேயே அவர் பரிதாபமாக இறந்தார். விபத்து நடந்ததும் லாரியை நிறுத்தி விட்டு டிரைவர் தப்பி ஓடி விட்டார்.

இதனை கண்டு ஆவேசம் அடைந்த அப்பகுதி மக்கள் 50-க்கும் மேற்பட்டோர் அங்கு திரண்டனர். அவர்கள் திடீர் மறியலில் ஈடுபட்டனர். இதனால் அப்பகுதியில் போக்குவரத்து பாதிக்கப்பட்டது.

ஆதம்பாக்கம் போலீசார் விரைந்து வந்து மறியலில் ஈடுபட்டவர்களுடன் சமாதான பேச்சு நடத்தினர். அப்போது பொதுமக்கள் கூறும்போது, “சாலை ஓரத்தில் குடிநீர் பணிக்காக போடப்பட்ட ராட்சத குழாயால் அடிக்கடி விபத்து ஏற்படுகிறது. இதனை அப்புறப்படுத்த வேண்டும். வேகத்தடை அமைக்க வேண்டும்” என்றனர்.

இது பற்றி சம்பந்தப்பட்ட அதிகாரிகளுடன் பேசி நடவடிக்கை எடுப்பதாக போலீசார் உறுதியளித்தனர். இதையடுத்து மறியலில் ஈடுபட்டவர்கள் கலைந்து சென்றனர்.

இது குறித்து பரங்கிமலை போக்குவரத்து போலீசார் வழக்குப்பதிவு செய்து விசாரணை நடத்தி வருகிறார்கள்.