காஞ்சிபுரம்

ஆலந்தூர்:

முதல்-அமைச்சர் எடப்பாடி பழனிசாமி டெல்லி சென்று பிரதமர் நரேந்திர மோடியை சந்தித்து 106 பக்க கோரிக்கை மனுவை அளித்தார்.

நேற்று மத்திய மந்திரிகள் நிதின்கட்காரி, வெங்கையா நாயுடு, ரவிசங்கர் பிரசாத் ஆகியோரையும் சந்தித்து கோரிக்கை மனுக்களை அளித்தார்.

டெல்லி பயணத்தை முடித்துக் கொண்டு முதல்- அமைச்சர் எடப்பாடி பழனிசாமி நேற்று நள்ளிரவு சென்னை திரும்பினார்.

விமான நிலையத்தில் அவர் நிருபர்களிடம் கூறியதாவது:-

கடந்த 27-ந்தேதி பிரதமர் மோடியை சந்தித்து கோரிக்கை மனுவை கொடுத்தோம். சில மத்திய மந்திரிகளையும் சந்தித்து கோரிக்கை மனு அளித்துள்ளோம்.

ஜல்லிக்கட்டு நிரந்தரமாக நடப்பதற்கு உரிய அனுமதி வழங்க உதவியதற்கு பிரதமரிடம் நன்றி தெரிவித்தோம்.

வறட்சி நிவாரண நிதி, வார்தா புயல் நிவாரண நிதி மற்றும் பல்வேறு திட்டங்களுக்கு விரைந்து நிதி ஒதுக்கீடு செய்ய கோரி உள்ளோம்.

மேலும் நீட் தேர்வு, அத்திகடவு- அவினாசி திட்டம், காவிரி பிரச்சினை, தமிழக மீனவர் பிரச்சினை போன்றவை பற்றியும், கூடங்குளம் அனுமின் நிலையத்தில் 3, 4-வது அலகுகளில் உற்பத்தி செய்யப்படும் 2000 மெகாவாட் மின்சாரத்தை தமிழகத்துக்கு வழங்க கோரிக்கை விடுத்து உள்ளோம்.

ஹைட்ரோ கார்பன் எரிவாயு திட்டத்தை சம்பந்தப்பட்ட விவசாயிகள் ஆலோசனை இன்றியும், மாநில அரசின் ஒப்புதலின்றியும் செயல்படுத்த கூடாது என்று பிரதமரிடம் கோரினோம்.

பிரதமர் மோடி கோரிக்கைகளை கனிவுடன் கேட்டு பரிசீலித்து உரிய ஆவண செய்யப்படும் என்று தெரிவித்து உள்ளார். அப்போது அவரிடம் நிருபர்கள், ஹைட்ரோகார்பன் எரிவாயு திட்டத்துக்கு எதிராக நடக்கும் நெடுவாசல் போராட்டம் குறித்து கேள்வி கேட்டனர்.

அதற்கு முதல்-அமைச்சர் எடப்பாடி பழனிசாமி பதில் கூறுகையில், “மறைந்த முதல்வர் ஜெயலலிதாவின் அரசு தமிழக அரசு, விவசாயிகளுக்கு பாதிப்பு ஏற்படுத்தக்கூடிய எந்த ஒரு திட்டத்தையும் ஏற்காது” என்றார்.

ஆலந்தூர்:

தமிழ்நாடு காங்கிரஸ் கட்சி தலைவர் திருநாவுக்கரசர் திருச்சி செல்லும் வழியில் சென்னை விமான நிலையத்தில் நிருபர்களை சந்தித்தார். அப்போது அவர் கூறியதாவது-

புதுக்கோட்டை நெடு வாசலில் இயற்கை எரிவாயு எடுக்க எதிர்ப்பு தெரிவித்து அந்த பகுதி மக்கள் போராட்டம் நடத்தி வருகிறார்கள்.

இன்று மாலை காங்கிரஸ் கட்சி சார்பாக நானும், காங்கிரஸ கட்சி சட்டமன்ற தலைவர் ராமசாமியும் அந்த பகுதி மக்களை சந்தித்து பேச உள்ளோம். தேவைப்பட்டால் மக்களுடன் இணைந்து காங்கிரஸ் கட்சியும் போராட்டம் நடத்தும்.

வருகிற 1-ந்தேதி அந்த பகுதி மக்கள் ‘பந்த்’ போராட்டத்தை அறிவித்து உள்ளனர். அதற்கு காங்கிரஸ் கட்சி ஆதரவு தரும். இந்த பந்த் போராட்டத்துக்கு அரசியல் கட்சிகள், வியாபார மக்கள், மற்றும் பல அமைப்புகள் ஆதரவு தர வேண்டும் என கேட்டுக் கொள்கிறேன். நான் புதுக்கோட்டை மாவட்டத்தை சேர்ந்தவர் என்பதாலும் அப்பகுதி நாடாளுமன்ற உறுப்பினராக இருந்திருக்கிறேன் என்பதாலும் எனக்கு கூடுதல் பொறுப்பு உள்ளதாக உணர்கிறேன்.

தமிழ்நாடு முழுவதும் ரேசன் கடையில் முறையாக அரிசி, பருப்பு, பாமாயில் வழங்கப்படவில்லை. இதில் தமிழக அரசு உடனடியாக தலையிட்டு ஏழை,. எளிய மக்களுக்கு உணவு பொருட்கள் வழங்க நடவடிக்கை எடுக்க வேண்டும் என கேட்டுக் கொள்கிறேன். இல்லை எனில் தமிழ்நாடு முழுவதும் உள்ள ரேசன் அலுவலகங்களில் காங்கிரஸ் போராட்டம் நடத்தும்.

தமிழ்நாட்டில் நீட் தேர்வு நடக்கும் என்று சில பா.ஜ.க. தலைவர்கள் கூறி இருக்கிறார்கள். ஆனால் தமிழக முதல்-அமைச்சர் எடப்பாடி பழனிசாமி பிரதமரை சந்தித்து நீட் தேர்வில் இருந்து விலக்கு அளிக்க வேண்டும் என்று கோரிக்கை மனு கொடுத்து வலியுறுத்துவதாக பத்திரிகையில் செய்திகள் வெளி வந்துள்ளன. ஏற்கனவே தமிழக சட்டமன்றத்தில் நீட் தேர்வுக்கு விதி விலக்கு வேண்டும் என்று தீர்மானம் கொண்டு வந்து அதை மத்திய அரசுக்கும், ஜனாதிபதிக்கும் அனுப்பிவைக்கப்பட்டு உள்ளது.

இதில் மத்திய அரசு உடனடியாக தலையிட்டு நீட் தேர்வில் இருந்து தமிழகத்திற்கு விதி விலக்கு அளிக்க வேண்டும்.

இவ்வாறு அவர் கூறினார்.

ஆலந்தூர்:

அமைச்சர் டி.ஜெயக்குமார் இன்று காலை டெல்லி சென்றார். சென்னை விமான நிலையத்தில் அவர் நிருபர்களுக்கு பேட்டி அளித்தார். அவர் கூறியதாவது:-

பொதுமக்களுக்கு பாதிப்பு ஏற்படும் எந்த ஒரு திட்டத்தையும் மறைந்த முதல்-அமைச்சர் ஜெயலலிதா ஏற்றுக் கொள்ளமாட்டார். அவர் வழியில் தற்போது நடக்கும் ஆட்சியில் பொதுமக்களுக்கு பாதிப்பை ஏற்படுத்தும் எந்த ஒரு திட்டத்தையும் கொண்டுவர மாட்டோம்.

ஹைட்ரோ ஹார்பன் திட்டம் குறித்து மக்களிடம் கருத்து கேட்போம். மக்கள் எதிர்ப்பு தெரிவிக்கும் நிலையில் மக்களுக்கு துணை நிற்போம்.

முதல்-அமைச்சர் எடப்பாடி பழனிசாமி பிரதமர் மோடியை சந்திகும் போது தமிழகத்துக்கு தேவையான நிதி உதவிகளை வழங்க வேண்டும் என்று வலியுறுத்துவார்.

இவ்வாறு அவர் கூறியுள்ளார்.

மாமல்லபுரம்:

மாமல்லபுரம் கிழக்கு கடற்கரை சாலையில் நாடார் சங்க கட்டிடம் அருகே இன்று காலை 6 மணிக்கு புதுவை அரசு பஸ் சென்னையை நோக்கி வந்து கொண்டிருந்தது. பஸ்சில் 30 பயணிகள் இருந்தனர்.

அப்போது எதிரே 4 வாலிபர்கள் ரேஸ் பைக்கில் வேகமாக வந்தனர். அவர்கள் கட்டுப்பாட்டை இழந்து தாறுமாறாக வருவதை பார்த்த டிரைவர் விநாயக மூர்த்தி கடும் அதிர்ச்சி அடைந்தார்.

கண் இமைக்கும் நேரத்தில் ஒரு பைக் பஸ்சின் முன்பகுதியில் பயங்கரமாக மோதியது. இதில் பஸ்சின் அடியில் சிக்கிய அந்த பைக் தீப்பிடித்து எரிய தொடங்கியது. பஸ்சிலும் தீப்பிடித்தது.

பின்னால் வந்த மற்ற பைக்குகளும் மோதி வாலிபர்கள் கீழே விழுந்தனர். தீபிடித்த பைக்கை ஓட்டி வந்த சென்னை வில்லிவாக்கத்தை சேர்ந்த விஜய் ஸ்ரீ ரக்‌ஷன் (வயது 28) என்பவர் உடல் கருகினார். இதில் அவர் சம்பவ இடத்திலேயே இறந்தார்.

மற்ற வாலிபர்கள் படுகாயம் அடைந்து ரோட்டில் கிடந்தனர். பஸ்சின் முன் பகுதி தீப்பிடித்து எரிவதை கண்டதும் பயணிகள் அலறியடித்தபடி கீழே இறங்கி ஓடினர்.

இது குறித்து தகவல் அறிந்ததும் தீயணைப்பு படையினர் விரைந்து வந்து பஸ், மோட்டார் சைக்கிளில் எரிந்த தீயை அணைத்தனர். போலீசார் சம்பவ இடத்துக்கு வந்து பலியான விஜய் ஸ்ரீ ரக்‌ஷன் உடலை மீட்டு ஆஸ்பத்திரிக்கு அனுப்பி வைத்தனர்.

படுகாயம் அடைந்த டியோட்டர் உள்பட 3 பேரை சிகிச்சைக்காக ஆஸ்பத்திரியில் சேர்த்தனர். அவர்களுக்கு தீவிர சிகிச்சை அளிக்கப்பட்டு வருகிறது.

காயம் அடைந்தவர்களில் மாரி என்பவர் பஸ்சின் பின்னால் மோட்டார் சைக்கிளில் வந்த போது விபத்தில் சிக்கியதும் தெரிகிறது. பைக் ரேசில் வேகமாக வந்த போது பஸ்சில் மோதி விபத்து நடந்துள்ளது.

இந்த விபத்தால் கிழக்கு கடற்கரை சாலையில் கடும் போக்குவரத்து பாதிப்பு ஏற்பட்டது. பலியான விஜய் ஸ்ரீ ரக்‌ஷன் சென்னை தரமணியில் உள்ள ஒரு கால் சென்டர் கம்பெனியில் வேலை பார்த்து வந்தது தெரிய வந்தது.

மாமல்லபுரம் கிழக்கு கடற்கரை சாலையில் வார இறுதி நாட்களான சனி, ஞாயிற்றுக்கிழமைகளில் வாலிபர்கள் பைக் ரேசில் ஈடுபடுகிறார்கள். போலீசார் கடுமையாக எச்சரித்தும், தீவிரமாக கண்காணித்தும் அதையும் மீறி அவர்கள் பந்தயத்தில் ஈடுபடுகிறார்கள்.

இதனால் கிழக்கு கடற்கரை சாலையில் வாகன ஓட்டிகள் கடும் அச்சத்துடனே செல்ல வேண்டிய நிலை உள்ளது. எனவே பைக் ரேசில் ஈடுபடுபவர்களை போலீசார் தடுத்து நிறுத்த வேண்டும் என்று பொது மக்கள் கோரிக்கை விடுத்துள்ளனர்.