உடுமலை :
திருப்பூர் மாவட்டம் உடுமலை அருகே உள்ள மேற்கு தொடர்ச்சி மலையில் உடுமலை வனச்சரகத்துக்கு உட்பட்ட அடர்ந்த வனப்பகுதியில் மாவடப்பு,ஈசல்திட்டு,குருமலை,குளிப்பட்டி உள்ளிட்ட 15 மேற்பட்ட வனக்குடியிருப்புகள் உள்ளன.இங்குள்ள குளிப்பாட்டி வனக் குடியிருப்பில் சுமார் 150க்கும் மேற்பட்ட மலைவாழ் குடும்பங்கள் வசித்து வருகின்றனர்.
இங்குள்ள மலைவாழ் மக்களின் குழந்தைகளின் கல்விக்காக கடந்த 20 ஆண்டுக்கு முன் ஆரம்ப பள்ளி கட்டிடம் கட்டப்பட்டது. வருடங்கள் பல ஆனதால் பள்ளிக்கட்டிடம் வலுவிழந்து வகுப்பறையின் உள்ளே கான்கிரீட் பெயர்ந்து விழுந்து,கட்டிடம் முழுமையாக இடியும் நிலையில் இருந்தது.
மேலும் சில இடங்களில் மேற்கூரை வலுவிழந்தும், சுவரில் விரிசல் ஏற்பட்டும் காணப்பட்டதால், குழந்தைகளின் பாதுகாப்பு கருதி ஆசிரியர்களும் பெற்றோரும் அருகில் உள்ள மலைவாழ் மக்கள் வீடு ஒன்றின் முன்பாக செட் அமைத்து அங்கு வகுப்புகள் நடைபெற்று வந்தது.
1-ம் வகுப்பு முதல் 5-ம் வகுப்பு வரை செயல்படும் இந்த பள்ளியில் 30 குழந்தைகள் பயின்று வருகின்றனர்.இரு ஆசிரியர்கள் இங்கு பணிபுரிந்து வரும் நிலையில்,தமிழக அரசு உடனடியாக நடவடிக்கை எடுத்து இந்த பள்ளிக் கட்டிடத்தை சீரமைத்து தங்கள் குழந்தைகளின் கல்வியை காக்க முன் வர வேண்டும் என குளிப்பட்டி மலைவாழ் மக்கள் அரசுக்கு ஏற்கனவே கோரிக்கை விடுத்திருந்தனர்.
இந்நிலையில் மேற்கு தொடர்ச்சி மலைப் பகுதிகளில் கடந்த சில தினங்களாக கனமழை பெய்து வருகிறது. இந்நிலையில் குளிப்பட்டி உள்ளிட்ட மேற்கு தொடர்ச்சி மலைப் பகுதியில் இரண்டு மணி நேரத்துக்கு மேலாக கன மழை பெய்தது.அப்போது ஏற்கனவே வலுவிழந்து காணப்பட்ட பள்ளிக் கட்டிடத்தின் ஒரு பகுதி திடீரென இடிந்து விழுந்தது.அப்போது அங்கு பள்ளிக் குழந்தைகள் யாரும் இல்லாததால் பெரும் அசம்பாவிதம் தடுக்கப்பட்டது.
இது குறித்து அந்த கிராமத்தை சேர்ந்தவர்கள் கூறுகையில், குளிப்பட்டி பள்ளிக்கூடம் கொரோனாவுக்கு பின் திறக்கப்பட்டது முதல் மாணவர்கள் மிகுந்த ஆர்வத்தோடு பள்ளிக்கு சென்று வந்தனர். இந்நிலையில் குளிப்பட்டி கிராமம் இராவணாபுரம் ஊராட்சிக்கு உட்பட்ட தாகும். வலுவிழந்து உள்ள பள்ளிக் கட்டிடத்துக்கு பதில் புதிய கட்டிடம் வேண்டி பல முறை மனு கொடுத்தோம். ஆனால் இதுவரை நடவடிக்கை எடுக்கவில்லை.
தற்திபோது மழையில் திடீரென கட்டிடத்தின் ஒரு பகுதி இடிந்து விழுந்துள்ளது.மொத்த கட்டிடமும் வழுவிழந்து காணப்படுவதால் இதனை முழுமையாக அகற்றி புதிய கட்டிடம் கட்டிக் கொடுத்து மலைவாழ் குழந்தைகளின் கல்வியை தமிழக அரசு உறுதி செய்ய வேண்டும் என கோரிக்கை விடுத்துள்ளனர்.
