கடலூர்

விருத்தாசலம்:

கடலூர் மாவட்டம் விருத்தாசலம் ஆலடி அருகே உள்ள ராமநாத புரத்தைச் சேர்ந்தவர் வைத்திலிங்கம், விவசாயி. இவரது மகன் ஆகாஷ்வர்மா (வயது 4).

இவரது வீட்டின் அருகே ஆதிகேசவ பெருமாள் (35) என்பவர் வசித்து வருகிறார். இவருக்கு குடிப்பழக்கம் உண்டு. நேற்று இரவு குடிபோதையில் வீட்டில் இருந்தார். அப்போது அவரது வீட்டின் முன்பு ஆகாஷ் வர்மா மற்றும் சிறுவர்கள் விளையாடி கொண்டு இருந்தனர்.

ஆகாஷ்வர்மா தனது இடுப்பில் வெள்ளியால் ஆன அரைஞாண் கயிறு (வெள்ளிக்கொடி) அணிந்திருந்தான்.

இதைப்பார்த்த ஆதிகேசவ பெருமாள் அதை அந்த சிறுவனிடம் இருந்து பறிக்க வேண்டும் என்று நினைத்தார். உடனே அவர் சிறுவனை வீட்டிற்குள் அழைத்துச்சென்றார்.

ஆகாஷ்வர்மாவின் அரைஞாண் கயிற்றை பறிக்க முயன்றார். இதைப் பார்த்த அந்த சிறுவன் சத்தம் போட்டான். இதில் ஆத்திரம் அடைந்த ஆதிகேசவபெருமாள் அவனை ஓங்கி அடித்தார். இதில் சிறுவன் மயங்கி விழுந்தான். உடனே ஒரு பித்தளை பார்த்திரத்திற்குள் சிறுவனை தூக்கிப்போட்டு மூடினார்.

சிறுவன் ஆகாஷ்வர்மா வெகுநேரமாக வீட்டினுள் இருந்து வெளியே வராததால் சந்தேகம் அடைந்த சிறுவர்கள் ஆகாஷ்வர்மாவின் பெற்றோர் மற்றும் அக்கம் பக்கத்தில் இருந்தவர்களிடம் தகவல் தெரிவித்தனர். அவர்கள் ஆதிகேசவ பெருமாள் வீட்டிற்கு சென்று சிறுவன் பற்றி விசாரித்தனர். அதற்கு அவர் தனக்கு எதுவும் தெரியாது என்றார்.

சந்தேகம் அடைந்த அவர்கள் வீட்டிற்குள் தேடியபோது அங்குள்ள பித்தளை பாத்திரத்திற்குள் சிறுவன் மூடி வைக்கப்பட்டிருந்தான்.

மயங்கிய நிலையில் இருந்த சிறுவனை மீட்டு விருத்தாசலம் அரசு ஆஸ்பத்திரிக்கு கொண்டு சென்றனர். அங்கு அவனை பரிசோதித்த டாக்டர்கள், அவன் ஏற்கனவே இறந்து விட்டதாக தெரிவித்தனர்.

உடனே சிறுவன் ஆகாஷ்வர்மா உடலை அவனது வீட்டிற்கு கொண்டு வந்தனர். அவனது உடலை பார்த்து பெற்றோர் மற்றும் உறவினர்கள் கதறி துடித்தது பரிதாபமாக இருந்தது.

சிறுவனை தாக்கி கொலை செய்த ஆதிகேசவ பெருமாள் தன் வீட்டின் அருகே குடிபோதையில் அமர்ந்திருந்தார். அவரை பொதுமக்கள் சரமாரியாக தாக்கினார்கள்.

வலி தாங்க முடியாமல் அவர் தனது வீட்டிற்குள் ஓடினார். அங்கிருந்த விஷப்பாட்டிலை எடுத்து குடித்தார். வீட்டு முன்பு மயங்கி விழுந்தார்.

ஆதிகேசவ பெருமாளை மீட்டு விருத்தாசலம் அரசு ஆஸ்பத்திரிக்கு கொண்டு சென்றனர். பின்னர் மேல் சிகிச்சைக்காக விழுப்புரம் முண்டியம் பாக்கம் அரசு ஆஸ்பத்திரியில் சேர்த்தனர். அங்கு அவருக்கு தீவிர சிகிச்சை அளிக்கப்படுகிறது.

இது குறித்து ஆலடி போலீசில் புகார் செய்யப்பட்டது. போலீசார் சம்பவ இடத்திற்கு விரைந்து வந்து விசாரணை நடத்தினர்.

கொலை செய்யப்பட்ட ஆகாஷ்வர்மாவின் உடலை கைப்பற்றி பிரேத பரிசோதனைக்காக விருத்தாசலம் அரசு ஆஸ்பத்திரிக்கு அனுப்பி வைத்தனர்.

குடிபோதையில் சிறுவன் அடித்துக்கொலை செய்யப்பட்ட சம்பவம் அந்த பகுதியில் பெரும் பரபரப்பை ஏற்படுத்தி உள்ளது.

பண்ருட்டி:

கடலூர் மாவட்டம் பண்ருட்டியில் தே.மு.தி.க.– மக்கள் நல கூட்டணி– த.மா.கா. சார்பில் தேர்தல் பிரசார பொதுக்கூட்டம் நடைபெற்றது.

கூட்டத்தில் தே.மு.தி.க. தலைவர் விஜயகாந்த் கலந்து கொண்டு கூட்டணி கட்சி வேட்பாளர்களான பண்ருட்டி–சிவக்கொழுந்து (தே.மு.தி.க.), நெய்வேலி–ஆறுமுகம் (மார்க்சிஸ்ட் கம்யூனிஸ்டு), கடலூர்–சந்திரசேகரன் (தமிழ் மாநில காங்கிரஸ்), குறிஞ்சிப்பாடி–பாலமுருகன் (தே.மு.தி.க.) ஆகியோரை ஆதரித்து பேசினார்.

அப்போது அவர் பேசியதாவது:–

தேர்தல் பிரசார கூட்டத்தில் தி.மு.க.வும், அ.தி.மு.க.வும் மக்களுக்கு காசு கொடுத்து கூட்டத்தை கூட்டுகிறார்கள். இங்கு வந்துள்ள கூட்டம் காசு கொடுத்து வந்த கூட்டம் அல்ல. அவர்களாகவே வந்த கூட்டம்.

ஆட்சியின்போது கொள்ளையடித்த பணத்தை தேர்தல் நேரத்தில் எப்படியெல்லாம் செலவு செய்கிறார்கள் பாருங்கள்.

அ.தி.மு.க. தேர்தல் அறிக்கையில் 100 யூனிட் மின்சாரம் இலவசம் என்று அறிவிக்கப்பட்டுள்ளது. கடலூரில் மழை வெள்ளம் வந்தபோது மின்சாரம் இல்லை. தானே புயல் தாக்கியபோது மின்சாரம் இல்லை.

மக்கள் கடுமையாக பாதிக்கப்பட்டனர். பலர் வருவாய் இழந்து தவித்தனர். அப்போது 100 யூனிட் மின்சாரம் இலவசம் என்று அறிவிக்க வேண்டியதுதானே. அப்போது ஏன் அவர் அறிவிக்கவில்லை.

குடும்ப அட்டை வைத்துள்ள அனைவருக்கும் இலவச செல்போன் என்று கூறியுள்ளார். இதுபோன்று தேர்தல் அறிக்கையில் இலவசங்களை ஜெயலலிதா அள்ளி விட்டிருக்கிறார். ஜெயலலிதாவின் இலவச அறிவிப்புகள் அனைத்தும், அவரது தோல்வி பயத்தை காட்டுகிறது.

தற்போது வீடுகளுக்கு யூனிட்டுக்கு 3 ரூபாயும், கடைகளுக்கு யூனிட்டுக்கு ரூ.7–ம் கட்டணமாக வசூலிக்கப்படுகிறது. நாளை மின்கட்டணத்தை உயர்த்தினால், மின் கட்டணத்தை உயர்த்தி இருக்கிறோம் என்று அவர்கள் சொல்வார்களா? சொல்ல மாட்டார்கள்.

தி.மு.க.வும், அ.தி.மு. க.வும் ஒரே குட்டையில் ஊறிய மட்டைகள்தான் என்று அன்றே காமராஜர் சொன்னார். அப்போது அவர் சொன்னதை சிலர் கேலி செய்தனர். அவர் சொன்னது இப்போதுதான் மக்களுக்கு தெளிவாக தெரிகிறது.

இந்த சட்டமன்ற தேர்தலில் 6 தலைவர்கள் கூட்டணி அமைத்து தேர்தலை சந்திக்கிறோம். ஆறுமுகத்துக்கு என்றுமே ஏறு முகம்தான். தி.மு.க., அ.தி.மு.க. கட்சிகளை நம்பாதீர்கள். இரு கட்சிகளும் ஊழல் கட்சிகள்தான். அவர்களை நீங்கள்தான் அகற்ற வேண்டும். அம்மா உப்பு, அம்மா உணவகம், அம்மா குடிநீர் என்று பல திட்டங்களுக்கு அம்மா பெயர் வைத்திருக்கிறார்களே. ஏன் புரட்சி தலைவர் எம்.ஜி.ஆரின் பெயரை வைக்க வேண்டியது தானே. வைக்க மாட்டார்கள்.

தேர்தல் நேரத்தில் மட்டும் எம்.ஜி.ஆரின் பெயரை பயன்படுத்தி, ஜெயலலிதா ஆதாயம் பெறுகிறார். தேவைப்பட்டால் மட்டுமே புரட்சி தலைவரின் புகைப்படத்தையும், அவரது பெயரையும் பயன்படுத்துகிறார். இதையெல்லாம் மக்கள் பார்த்துக்கொண்டுதான் இருக்கிறார்கள். மே 16–ந் தேதி மக்கள் தகுந்த பாடம் புகட்டுவார்கள்.

இது தர்மத்துக்கும், அதர்மத்துக்கும் இடையே நடக்கின்ற போர். தர்மத்தின் பக்கம் உள்ளவர்கள் கூட்டணி கட்சி வேட்பாளர்களுக்கு வாக்களித்து வெற்றிபெற செய்ய வேண்டுமாறு கேட்டுக்கொள்கிறேன்.

இவ்வாறு அவர் பேசினார்.