கடலூர்

பெண்ணாடம்:

பெண்ணாடம் அருகே உள்ள தாழநல்லூர் பெருமாள் கோவிலில் மண்டல பூஜை விழா நேற்று இரவு நடைபெற்றது.

தீவலூர் பகுதியை சேர்ந்த சூரியபிரகாசும்(வயது 18), அவரது நண்பரும் மோட்டார் சைக்கிளில் தாழநல்லூர் பெருமாள் கோவில் அருகே வந்தனர். அப்போது அவர்கள் கூச்சலிட்டபடி சென்றதாக கூறப்படுகிறது. அவர்களை அந்த பகுதியைச் சேர்ந்த விவசாயி பொன்னுசாமி(40) கண்டித்தார். இதனால் அவர்களுக்கிடையே வாக்கு வாதம் ஏற்பட்டது.

பின்னர் சூரியபிரகாசும், அவரது நண்பரும் கோபத்தில் அங்கிருந்து தீவலூர் சென்றனர். உறவினர்கள் மற்றும் நண்பர்களை அழைத்துக் கொண்டு மீண்டும் மோட்டார் சைக்கிளில் தாழநல்லூர் வந்தனர். கோவிலில் இருந்தவர்களிடம் அவர்கள் வாக்குவாதத்தில் ஈடுபட்டனர். இதனால் இரு தரப்பினருக்கும் இடையே மோதல் ஏற்பட்டது.

இதுகுறித்து பெண்ணாடம் போலீசில் புகார் செய்யப்பட்டது. இன்ஸ்பெக்டர் ராஜா, சப்-இன்ஸ்பெக்டர் ஜெயந்தி மற்றும் போலீசார் அங்கு விரைந்து வந்தனர்.

இந்த மோதல் தொடர்பாக தீவலூரை சேர்ந்த சூரியபிரகாஷ், கார்த்திக்ராஜ், மேகராஜன், விஜயகாந்த், விஜயசங்கர், விஜயராஜ், ஹரிகிருஷ்ணன், தினேஷ் குமார், விக்னேஸ்வரன் ஆகிய 9 பேரை போலீசார் கைது செய்தனர்.

இவர்களில் சூரிய பிரகாஷ் ஐ.டி.ஐ யும், விக்னேஷ்வரன் 10-ம் வகுப் பும் படித்து வருகிறார்கள்.

ஸ்ரீமுஷ்ணம்:

சோழத்தரம் அருகே வடக்குபாளையங்கோட்டை கிராமத்தில் மதுபாட்டில்கள் பதுக்கி வைத்து விற்பனை செய்யப்படுவதாக சோழத்தரம் போலீசாருக்கு ரகசிய தகவல் கிடைத்தது. இதையடுத்து போலீசார் வடக்குபாளையங்கோட்டை கிராமத்தில் ரோந்து பணி மேற்கொண்டனர்.

அப்போது அங்கு அதே ஊரைச்சேர்ந்த பக்கிரிநாதன் (வயது 45) என்பவர் தனது வீட்டில் மதுபாட்டில்களை பதுக்கி வைத்து விற்பனை செய்து வந்தது தெரியவந்தது. அதனை தொடர்ந்து பக்கிரிநாதனை போலீசார் கைது செய்தனர்.

கடலூர்:

வங்கக்கடலில் உருவான குறைந்த காற்றழுத்த தாழ்வு மண்டலம் புயலாக மாற வாய்ப்பு உள்ளது. தமிழகத்தில் சில பகுதிகளில் மழைபெய்யும் என்று வானிலை ஆய்வு மையம் அறிவித்து இருந்தது.

இதையொட்டி தமிழகத்தின் பல்வேறு பகுதிகளில் கடற்கரையில் நேற்று முன்தினம் 1-ம் எண் எச்சரிக்கை கூண்டு ஏற்றப்பட்டது. கடலூர் துறைமுகத்திலும் 1-ம் எண் எச்சரிக்கை கூண்டு ஏற்றப்பட்டுள்ளது.

கடலூரில் நேற்று கடல் மிக சீற்றத்துடன் காணப்பட்டது. அதிக உயரத்துக்கு அலைகள் எழுந்தன. கடற்கரை பகுதியில் பலத்த காற்று வீசியது. இதனால் கடலூர் மற்றும் சுற்றுப்புற பகுதிகளில் உள்ள மீனவர்கள் நேற்று மீன் பிடிக்க செல்லவில்லை. இன்றும் தொடர்ந்து கடல் சீற்றத்துடன் காணப்படுகிறது.

எனவே மீனவர்கள் 2-வது நாளாக மீன்பிடிக்க செல்லவில்லை. கடலூர் துறைமுகம், தேவனாம்பட்டினம், நல்லவாடு, ராசாபேட்டை, கிள்ளை, பரங்கிபேட்டை, அக்கரகோரி ஆகிய பகுதிகளில் மீனவர்கள் கடற்கரை ஓரத்தில் படகுகளை பாதுகாப்பாக நிறுத்தி உள்ளனர்.

மீனவர்கள் மீன் பிடிக்க செல்லாததால் கடற்கரை ஓரங்களில் 6 ஆயிரம் படகுகள் ஓய்வெடுக்கின்றன. கடலூரில் குளத்து மீன்கள் விற்பனை அமோகமாக உள்ளது. அதிக விலைக்கு இந்த மீன்கள் விற்கப்பட்டன.

பண்ருட்டி:

கடலூர் மாவட்டம் பண்ருட்டி அருகே உள்ள கீழ்மாம்பட்டு பகுதியை சேர்ந்தவர் பழனிவேல் (வயது 42). இவர் நடுவீரப்பட்டு பகுதியில் உள்ள டாஸ்மாக் கடையில் விற்பனையாளராக பணிபுரிந்து வருகிறார்.

தினமும் பழனிவேல் வேலைக்கு மோட்டார் சைக்கிளில் செல்வது வழக்கம். நேற்று இரவு விற்பனை முடிந்து கடையை பூட்டினார். மது விற்பனை செய்த பணம் ரூ.2 லட்சத்து 10 ஆயிரத்தை எடுத்துக்கொண்டு மோட்டார் சைக்கிளில் வீட்டுக்கு புறப்பட்டார். இதை அறிந்த 2 வாலிபர்கள் பழனிவேலை பின்தொடர்ந்து மோட்டார் சைக்கிளில் வந்தனர்.

புதுப்பாளையம் பகுதியில் பழனிவேல் சென்று கொண்டிருந்தார். பின்தொடர்ந்து வந்த மர்ம நபர்கள் பழனிவேல் மோட்டார் சைக்கிளை வழிமறித்து உன்னிடம் உள்ள பணத்தை கொடு என்று மிரட்டினர். பழனிவேல் பணத்தை கொடுக்க மறுத்துவிட்டார். இதனால் ஆத்திரமடைந்த மர்மநபர்கள் உருட்டுகட்டையால் பழனிவேலை சரமாரியாக தாக்கினர். பழனிவேல் காப்பாற்றுங்கள், காப்பாற்றுங்கள் என்று கூச்சலிட்டார்.

அதற்குள் மர்ம நபர்கள் பழனிவேல் வைத்திருந்த ரூ.2 லட்சத்து 10 ஆயிரத்தை பறித்துக்கொண்டு மோட்டார் சைக்கிளில் தப்பினர். உருட்டுகட்டையால் தாக்கியதில் தலை மற்றும் கையில் பலத்த காயம் அடைந்த பழனிவேலை அக்கம் பக்கத்தினர் மீட்டு பண்ருட்டி அரசு ஆஸ்பத்திரியில் சேர்த்தனர். அங்கு அவருக்கு சிகிச்சை அளிக்கப்படுகிறது.

இதுகுறித்து பழனிவேல் காடாம்புலியூர் போலீசில் புகார் செய்தார். இன்ஸ்பெக்டர் வெங்கடேசன், சப்- இன்ஸ்பெக்டர் வனஜா ஆகியோர் வழக்குப்பதிவு செய்து கொள்ளையர்களை தேடி வருகின்றனர். டாஸ்மாக் ஊழியரை தாக்கி பணம் பறித்த சம்பவம் அப்பகுதியில் பெரும் பரபரப்பை ஏற்படுத்தியது.

கடலூர்:

கடலூர் புதுநகர் போலீஸ் நிலையத்தில் ஏட்டாக பணிபுரிபவர் இளமாறன் (வயது 46). இன்று அதிகாலை கடலூர் வில்வநகரில் ரோந்துபணியில் ஈடுபட்டிருந்தார். அப்போது பகவதி அம்மன்கோவில் தெருவில் வாலிபர் ஒருவர் நின்றுகொண்டிருந்தார்.

சந்தேகமடைந்த இளமாறன் அந்த வாலிபரிடம் ஏன் வெகுநேரமாக இங்கு நிற்கிறாய் என்று கேட்டார். ஆத்திரமடைந்த வாலிபர் கீழே கிடந்த கல்லால் இளமாறனை தாக்கி கொலை மிரட்டல் விடுத்தார். இதில் அவருக்கு காயம் ஏற்பட்டது. பின்னர் அங்கிருந்து அந்த வாலிபர் தப்பி ஓடினார். உடனே இளமாறன் ஓடி சென்று அவரை பிடிக்க முயன்றார் ஆனால் முடியவில்லை.

இதுகுறித்து இளமாறன் கடலூர் புதுநகர் போலீசில் புகார் செய்தார். போலீசார் வழக்குபதிவு செய்து வாலிபரை தேடி வந்தனர். அப்போது கல்லால் தாக்கியவர் வில்வநகர் பகவதியம்மன்கோவில் தெருவை சேர்ந்த அருண்குமார் (23) என்பது தெரியவந்தது. உடனே அவரை கைது செய்தனர். தொடர்ந்து அவரிடம் விசாரணை நடைபெற்று வருகிறது.