அரியலூர்

அரியலூர்:

அரியலூர் மாவட்ட ஆட்சியரகத்தில் மாவட்ட கலெக்டர் பெ.ரமண சரஸ்வதி, செய்தியாளர்களுக்கு    பேட்டியளித்தார். அப்போது அவர் தெரிவித்ததாவது:

தமிழகத்தில் கொரோனா நோய் தொற்றை கட்டுப்படுத்தும் வகையில் நாளை (16&ந் தேதி)தமிழக அரசின் சார்பில் முழு ஊடரங்கு அறிவிக்கப்பட்டுள்ளது. காணும் பொங்கல் என்பதால் அன்றைய தினம் அரியலூர் மாவட்டத்தில் விளையாட்டுப் போட்டிகள் நடத்தும் வழக்கம் உள்ளது. ஆனால் ஊரடங்கு என்பதால் அரியலூர் மாவட்டத்தில் எந்த விதமான போட்டிகளும் நடத்த அனுமதி இல்லை.

மற்ற நாட்களில் நடத்தப்படும் போட்டிகளுக்கு கடந்த ஆண்டை போலவே காவல் துறை, உள்ளாட்சி அமைப்புகள் உள்ளிட்ட துறைகளில் ஏற்கனவே உள்ள நடைமுறைகளின்படி உரிய அனுமதி பெற்று போட்டிகள் நடத்துவதுடன், சுகாதாரத்துறை அதிகாரிகளுடன் கலந்து ஆலோசித்தும் போட்டிகள் நடத்தப்பட வேண்டும்.

அரியலூர் மாவட்டத்தை பொருத்தவரையில் கொரோனா முதல் தவணை தடுப்பூசி 100 சதவீதமும், இரண்டாம் தவணை தடுப்பூசி சுமார் 86 சதவீதமும் செலுத்தப்பட்டுள்ளது. இரண்டாம் தவணை தடுப் பூசியையும் பொதுமக்களுக்கு முழுமையாக செலுத்த நடவடிக்கை மேற்கொள்ளப்பட்டுள்ளது.

கொரோனா தடுப்பு வழிமுறைகள் பின்பற்றி பொது இடங்களில் எந்தவொரு நிகழ்ச்சிகளும் நடைபெறுவது உறுதி செய்யப்படும். எனவே, பொது மக்கள் அனைவரும் கொரோனா தடுப்பு வழி முறைகளை தொடர்ந்து பின்பற்ற வேண்டும்.

கொரோனா தொற்றிலிருந்து பொதுமக்கள் அனைவரும் பாதுகாப்பாக இருக்க வேண்டிய நேரம் இது. இவ்வாறு கலெக்டர் தெரிவித்தார்.

இந்நிகழ்வில், மாவட்ட வருவாய் அலுவலர் ஜெய்னுலாப்தீன், ஊரக வளர்ச்சி முகமைத் திட்ட இயக்குநர் சுந்தர்ராஜன் மற்றும் அரசு அலுவலர்கள் உட்பட பலர் உடனிருந்தனர்.

அரியலூர்:

அரியலூரில் அரசு மருத்துவக் கல்லூரி அமைக்க வேண்டும் என மாவட்ட மக்கள் தொர்ந்து பல ஆண்டுகளாக கோரிக்கை விடுத்து வந்தனர்.

இதையடுத்து, கடந்த 2020 ஆம் ஆண்டு ஜூலை மாதம் 7 ஆம் தேதி அரியலூர் அரசு கலைக்கல்லூரிக்கு சொந்தமான இடத்தில் அரசு மருத்துவக்கல்லூரிக்கு அப்போதைய முதல்வர் பழனிசாமி அடிக்கல் நாட்டினார்.

அதைத்தொடர்ந்து 26 ஏக்கர் பரப்பளவில் ரூ.347 கோடி மதிப்பில்  அரசு மருத்துவக் கல்லூரி மற்றும் மருத்துவமனைக்கான கட்டுமானப்பணிகள் தொடங்கின.

இங்கு, தரைத்தளம் மற்றும் 2 மாடிகளுடன் கூடிய நிர்வாக அலுவலகம், தரைத்தளம் மற்றும் 6 மாடிகளுடன் கூடிய கல்லூரி, வங்கி, அஞ்சல் நிலையம், மருத்துவக் கல்லூரி முதல்வருக்கு தரைத்தளம் மற்றும் முதல் மாடியுடன் கூடிய கட்டிடம்,

மாணவர்கள் மற்றும் மாணவிகளுக்கு தரைத்தளம் மற்றும் 5 மாடிகள் கொண்ட கட்டிடம், பேராசிரியர்கள், உதவிப் பேராசிரியர்கள், அலுவலர்களுக்கான குடியிருப்புகள் கட்டப்பட்டுள்ளன.

இதனிடையே, மருத்துவ கல்லூரிகளுக்கான மத்தியக்குழு, அரசு மருத்துவக் கல்லூரி மருத்துவமனையின் செயல்பாட்டை தொடங்க அனுமதி அளித்தது.

இதன்படி, இந்த மருத்துவக்கல்லூரி உட்பட தமிழகத்தில் புதிதாக தொடங்கப்பட்டுள்ள 11 அரசு மருத்துவக் கல்லூரிகளை, பிரதமர் மோடி, டெல்லியில் இருந்து காணொலிக் காட்சி மூலம் இன்று திறந்து வைக்கிறார்.

நீண்டகால கோரிக்கை நிறைவேறியதால் அரியலூர் மாவட்ட பொதுமக்கள் மகிழ்ச்சி அடைந்துள்ளனர்.

அரியலூர்:

 அரியலூர் மாவட்டம் ஜெயங்கொண்டத்தை அடுத்த ஆண்டிமடம் அருகே உள்ள சிவலிங்கபுரம் கிராமத்தில் ஒரு தனியார் முந்திரி தோப்பு உள்ளது.

இப்பகுதியை சுற்றியிருப்பவர்கள் தங்கள் வளர்க்கும் கால்நடைகளை இங்கு மேய்ச்சலுக்க விடுவது வழக்கம்.

இதே போல், இன்று காலை, தங்கள் கால்நடைகளை முந்திரி தோப்பில் மேய்ச்சலுக்கு விடும்போது, தோப்பிலிருந்து துர்நாற்றம் வீசியுள்ளது. அப்போது ஆடு மேய்க்க சென்றவர்கள் ஏதேனும் இறந்து கிடக்கும் என இருந்துள்ளனர்.

துர்நாற்றம் அதிகரித்ததால், நாற்றம் அடித்த இடத்தை நோக்கிச் சென்று அவர்கள் பார்த்தனர். அப்போது, அங்கு முந்திரி மரத்தில் ஆண் ஒருவர் பிணமாக தூக்கில் தொங்கியவாறு இருந்ததை பார்த்து அதிர்ச்சி அடைந்தனர்.

இது குறித்து அவர்கள், உடனடியாக ஆண்டிமடம் போலீஸ் நிலையத்திற்கு தகவல் தெரிவித்தனர். தகவல் அறிந்து அங்கு வந்த போலீஸ் இன்ஸ்பெக்டர் குணசேகரன் தலைமையிலான போலீசார், மரத்தில் தூக்கில் தொங்கியவர் உடலை கீழே இறக்கினர்.

பிணமாக இருந்தவருக்கு சுமார் 40 வயதுக்கு மேல் இருக்கும் என்றும், அவர் அணிந்திருந்த வேஷ்டியை மரத்தில் சுருக்குப் போட்டு தொங்கிய நிலையிலும், முகக்கவசம் அணிந்த நிலையிலும் இருந்துள்ளார். பிறகு உடலை பிரேத பரிசோதனைக்காக ஜெயங்கொண்டம் அரசு மருத்துவமனைக்கு அனுப்பி வைத்தனர்.

கிராம நிர்வாக அதிகாரி கொடுத்த புகாரின் பேரில் வழக்குப்பதிவு செய்த போலீசார், அப்பகுதியில் இருந்தவர்களிடம் விசாரணை மேற்கொண்டனர்.

தூக்கில் பிணமாக கிடந்தவர் எந்த ஊரை சேர்ந்தவர்? அவரை யாரேனும் கொலை செய்து தூக்கில் தொங்க விட்டு இருப்பார்களா? என பல்வேறு கோணங்களில் விசாரணையை தீவிரப்படுத்தியுள்ளனர்.

அடையாளம் தெரியாத ஆண் பிணம் முந்திரிக்காட்டில் தொங்கியவாறு இருந்தது அப்பகுதி மக்களிடையே பெரும் அச்சத்தையும், பரபரப்பையும் ஏற்படுத்தியுள்ளது.

அரியலூர்:

அரியலூர் மாவட்டம், மணக்கால் கிராமத்தை சார்ந்த கருணாநிதி முத்துலெட்சுமி  தம்பதியினரின் மூன்றாவது மகன் கருப்பசாமி கடந்த ஏப்ரல் மாதம் விளையாடி கொண்டிருந்தபோது எதிர்பாராத விதமாக உயர் அழுத்த மின் மாற்றியில் கைப்பட்டதில் பலத்த காயம் அடைந்தார்.

பல மாத மருத்துவ சிகிச்சைக்கு பின்னர் கருப்பசாமியின் வலது கை அகற்றப்பட வேண்டும் என மருத்துவர்களால் தெரிவிக்கப்பட்டு அகற்றப்பட்டது.

அதனைத்தொடர்ந்து கருப்பசாமியின் தந்தை கருணாநிதி கலெக்டரின் பொதுமக்கள் குறைதீற்கும் கூட்ட நாளில் தன் மகனுக்கு செயற்கை கை பொருத்த வேண்டி மனு அளித்தார்.

இதனையடுத்து சென்னை யில் உள்ள செயற்கை கை செய்யும் நிறுவனமான சன் ஆர்த்தோடிக்ஸ்  மற்றும் ரிஹாப் அறக்கட்டளை நிறுவனர் மற்றும் நிர்வாக இயக்குனரும் முடநீக்கு வல்லுனரான ஜெயவேலால் கருப்பசாமிக்கு பரிசோதித்து செயற்கை கை அளவீடு முதலிய தொடர் நடவடிக்கைகள் எடுக்கப்பட்டது.

அதன் அடிப்படையில் கருப்பசாமிக்கு வெளிநாட்டிலிருந்து பிரத்யேகமாக தயார் செய்யப்பட்ட ரூ.65,000- மதிப்பிலான அதிநவீன செயற்கை கை வரவைக்கப்பட்டு அரியலூர் மாவட்ட கலெக்டரால் கருப்பசாமிக்கு வழங்கப்பட்டது.

இந்நிகழ்வில் கருப்பசாமியும் அவரது தந்தையும் கலெக்டருக்கு நெஞ்சார்ந்த நன்றியினை தெரிவித்துக்கொண்டனர். மேலும் இந்நிகழ்வின்போது 25 காது கேளாத மாற்றுத்திறனாளிக்கு ரூ.40,750- மதிப்பிலான காதொலி கருவியும் மற்றும் 15 மாற்றுத்திறனாளிகளுக்கு சட்டப்பூர்வமான பாதுகாவலர் நியமன சான்றிதழ் கலெக்டரால் வழங்கப்பட்டது.

அரியலூர்:

தமிழகம் முழுவதும் உள்ள அனைத்து மாவட்டங்களிலும் அந்தந்த மாவட்ட போலீசார் போதை தடுப்பு விழிப்புணர்வு குறித்து குறும்படம் தயாரித்து வழங்க உத்தரவிடப்பட்டு இருந்தது.

அதன்படி அனைத்து மாவட்ட போலீசாரும் போதை ஒழிப்பு குறித்து விழிப்புணர்வு ஏற்படுத்தும் வகையிலான குறும்படங்களை நடித்து தயாரித்து போட்டியில் கலந்து கொண்டனர்.

கடந்த வாரம் தமிழக போலீஸ் டி.ஜி.பி. சைலேந்திரபாபு முன்னிலையில் குறும்படங்கள் திரையிடப்பட்டன. அதில் அரியலூர் மாவட்ட காவல் துறை சார்பில் மாவட்ட போலீஸ்       சூப்பிரண்டு பெரோஸ்கான் அப்துல்லா மாவட்ட இணைய குற்ற தடுப்பு பிரிவு இன்ஸ்பெக்டர் செங்குட்டுவன் உள்ளிட்டோர் நடித்த குறும்படம் தயாரிக்கப்பட்டது.

இதில் சிறப்பாக எதார்த்தமான கிராம மக்கள் புரிந்து கொள்ளும் வகையில் கிரா மத்து பாணியில் எளிய முறையில் நிஜ போலீசாரை கொண்டு சிறப்பாக  நடித்து வழங்கப்பட்டது.

இந்த குறும்படம் மாநில அளவில் இரண்டாம் பரிசை தட்டிச்சென்றது. நடிகர் ஜெயம் ரவி காஞ்சிபுரம் மாவட்ட காவல் துறை சார்பில் நடித்து கொடுத்த குறும்படம் முதல்  பரிசை தட்டிச் சென்றது.

இதனை தமிழக காவல் துறை உயரதிகாரிகளும், அரியலூமாவட்ட பொதுமக்களும்  மாவட்ட காவல் துறையினரின் சிறப்பான பணியை பாராட்டி வருகின்றனர்.   

இந்தநிலையில் சிறப்பாக நடித்து 2 ஆம் பரிசை பெற்ற போலீசார் மற்றும் படத்தின் குழுவினருக்கு அரியலூர் மாவட்ட போலீஸ் சூப்பிரண்டு பெரோஸ்கான் அப்துல்லா        சான்றிதழ் வழங்கி பாராட்டினார்.

அரியலூர்:

கொரோனா பரவலை தடுக்கும் நடவடிக்கையாக தமிழக அரசு அறிவிப்பின்படி நேற்று அரியலூர் மாவட்டத்தில் முழுஊரடங்கு கடைபிடிக்கப்பட்டது.

ஜெயங்கொண்டம் நகராட்சிக்குட்பட்ட பகுதி முழுவதும் உள்ள காய்கறி கடைகள், மளிகை கடைகள், இறைச்சி கடைகள், வணிக வளாகங்கள், ஜவுளிகடைகள், நகைகடைகள் உள்ளிட்ட அனைத்து கடைகளும் அடைக்கப்பட்டுள்ளன.

வீதிகளில் போக்குவரத்து மற்றும் பொதுமக்கள் நடமாட்டம் இன்றி வெறிச்சோடி காணப்பட்டது. ஜெயங்கொண்டம் துணை போலீஸ் சூப்பிரண்டு கலைகதிரவன் தலைமையில் போலீசார் ஆங்காங்கே சோதனைச்சாவடிகளை அமைத்து கண்காணிப்பு பணிகளை மேற்கொண்டனர்.

மேலும் வாகனங்களில் வருபவர்களை எச்சரித்து அனுப்பி வைத்தனர். தொடர்ந்து இருசக்கர வாகனங்களில் வந்த வாகன ஓட்டிகளை மறித்து அத்தியாவசிய தேவையின்றி அனாவசியமாக சுற்றியவர்களிடம் 50&க்கும் மேற்பட்டோருக்கு அபராதம் விதிக்கப்பட்டது.

நகர் முழுவதும் போக்குவரத்து போலீஸ் இன்ஸ்பெக்டர் ஷகிராபானு, போலீஸ் சப் இன்ஸ்பெக்டர்கள், பாலகிருஷ்ணன், சுபா, இளங்கோவன், கல்யாணராமன் உள்ளிட்ட போலீசார் வாகன தணிக்கை மற்றும் பாதுகாப்பு பணியில் ஈடுபட்டு தேவையின்றி வந்தவர்களுக்கு அபராதம் விதித்து அறிவுரை கூறி அனுப்பி வைத்தனர்.

அரியலூர்:
அரியலூர் மாவட்டத்தில் ஓட்டக்கோவில், சாலையகுறிச்சி, இலுப்பையூர் பகுதிகளில் நடைபெற்ற 18 ஆவது கொரோனா தடுப்பூசி முகாமை மாவட்ட கலெக்டர் ரமண சரஸ்வதி பார்வையிட்டு ஆய்வு செய்தார்.

அப்போது அவர் தெரிவிக்கையில், அரியலூர் மாவட்டத்தில் 17 ஆவது கட்டமாக நடைபெற்ற தடுப்பூசி முகாம்களில் இது வரை முதல் தவணை தடுப்பூசி 6,38,231 நபர்களுக்கும், இரண்டாவது தவணை தடுப்பூசி 4,30,756 நபர்களுக்கும் தடுப்பூசிகள் செலுத்துப்பட்டுள்ளது.

18 ஆவது கட்டமாக மாபெரும் கொரோனா தொற்று தடுப்பூசி செலுத்தும் பணி மாவட்டத்தில் 6 ஒன்றியங்களுக்குட்பட்ட 254 இடங்களிலும், 2 பேரூராட்சிகளுக்குட்பட்ட 7 இடங்களிலும், 2 நகராட்சிகளுக்குட்பட்ட 13 இடங்களிலும், அரசு ஆரம்ப சுகாதார நிலையம், அரசு தலைமை மருத்துவமனை, மருத்துவக்கல்லூரி மருத்துவமனை உள்ளிட்ட 69 இடங்களிலும் என மொத்தம் 343 இடங்களில் சிறப்பு மையங்கள் ஏற்படுத்தப்பட்டு, தடுப்பூசி செலுத்தும் பணிகள் நடைபெற்றது.

எனவே முதல் தடுப்பூசி செலுத்திக்கொண்டவர்கள் குறிப்பிட்ட காலத்திற்குள் இரண்டாவது தடுப்பூசி செலுத்திக் கொண்டு 100 சதவீதம் கொரோனா தடுப்பூசி செலுத்தப்பட்ட மாவட்டமாக அரியலூர் மாவட்டத்தை மாற்றிட அனைத்து பொதுமக்களுக்கும் ஒத்துழைப்பு அளிக்க வேண்டும் என்றார்.