திட்டக்குடி:
கடலூர் மாவட்டம் திட்டக்குடி அருகே ஆவட்டி குடிக்காடு கிராமத்தை சேர்ந்தவர் பழனிமுத்து விவசாயி. அவரது மனைவி மீனாட்சி. இவர்கள் 2 பேரும் வீட்டின் வெளிப்புறம் தூங்கிக்கொண்டிருந்தனர். அதே வீட்டில் இன்னொரு அறையில் அவரது மகன் பெரியசாமி, மருமகள் தூங்கினர்.
நள்ளிரவில் மர்மநபர்கள் வீட்டின் பின்புறம் உள்ள இரும்பு கதவை நூதன முறையில் திறந்து உள்ளே சென்றனர். பின்னர் 2 அறைகளில் உள்ள பீரோவைத் திறந்தனர். பின்னர் அதிலிருந்த சிறிய நகை வைக்கும் பெட்டியை வீட்டுக்கு பின்னால் உள்ள கரும்பு வயலுக்கு தூக்கி சென்றனர். அதனை உடைத்து அதில் இருந்த 5 பவுன் நகை, 53 ஆயிரம் பணம் ஆகியவற்றை எடுத்து சென்றனர்.
இன்று அதிகாலை 4 மணி அளவில் பெரியசாமி விவசாய நிலத்திற்கு மின் மோட்டாரை இயக்க செல்லும்போது வீட்டின் பின்புறத்தில் உள்ள கதவுகள் திறந்து கிடப்பது கண்டு அதிர்ச்சி அடைந்தார். உள்ளே சென்று பார்த்தபோது பீரோவில் இருந்த பணம்-நகை கொள்ளை போனது தெரியவந்தது,
இதுகுறித்து ராமநத்தம் போலீசாருக்கு தகவல் தெரிவிக்கப்பட்டது. தகவலின்பேரில் சம்பவ இடத்துக்கு வந்த ராமநத்தம் போலீஸ் சப்-இன்ஸ்பெக்டர் விசுவநாதன் மற்றும் போலீசார் கொள்ளை சம்பவம் குறித்து வழக்கு பதிவு செய்து விசாரணை மேற்கொண்டனர்.
