செஞ்சி:
செஞ்சி பகுதி கோவில்களில் தைப்பூசம் நடைபெற்றது.
செஞ்சியை அடுத்த தேவதானம் பேட்டையில் உள்ள தண்டாயுதபாணி கோவிலில் தைப்பூச விழா கடந்த 7-ந் தேதி கொடியேற்றத்துடன் தொடங்கி நடைபெற்று வந்தது. தினமும் சாமிக்கு சிறப்பு அபிஷேக ஆராதனை, சிறப்பு பூஜைகள் நடைபெற்றது.
தைப்பூசத்தை முன்னிட்டு நேற்று காலையில் சாமிக்கு சிறப்பு அபிஷேக ஆராதனை வெள்ளிக்கவச அலங்காரம் ஆகியவையும் தொடர்ந்து மதியம் பால்குட ஊர்வலம் பாலபிஷேகம் ஆகியவையும் நடைபெற்றது.
மாலையில் கோவில் தர்மகர்த்தா அருட்பெருஞ்ஜோதி சாமிகள் மார்பு மீது மாவு இடித்து மிளகாய் பொடி அபிஷேகம் நடைபெற்றது. தொடர்ந்து மாலையில் தீமிதி திருவிழாவும் அதைத் தொடர்ந்து தேர்த்திருவிழாவும் நடைபெற்றது. இதில் ஏராளமான பக்தர்கள் முதுகில் அலகு குத்தி தேர் இழுத்தனர். மேலும் வேன், கார் போன்றவைகளையும் இழுத்து சென்றனர். இதில் ஏராளமான பக்தர்கள் பரவசத்துடன் கலந்து கொண்டனர்.
இதேபோல் செஞ்சி கொத்தமங்கலம் சாலை சிறுகடம்பூர் கிருஷ்ணா புரத்தில் உள்ள கிருஷ்ண கிரிமலை அருகில் சுப்ரமணியசாமி கோவிலில் 42-ம் ஆண்டு தைப்பூசத் திருவிழா நடைபெற்றது. இதனை முன்னிட்டு நேற்று முன்தினம் விநாயகப் பெருமானுக்கு சிறப்பு பூஜையுடன் விழா தொடங்கியது. தொடர்ந்து சுப்பிரமணிய சுவாமிக்கு அபிஷேக ஆராதனைகள், சிறப்பு பூஜைகள் நடைபெற்றது.
நேற்று தைப்பூசத்தை முன்னிட்டு காலையில் சுப்பிரமணிய சாமிக்கு சிறப்பு அபிஷேக ஆராதனை நடைபெற்றது. மேலும் 108 திரவிய அபிஷேகமும் நடைபெற்றது. தொடர்ந்து அலங்கரிக்கப்பட்ட சுப்பிரமணியசாமியை தேரில் வைத்து தேர் திருவிழா நிகழ்ச்சி நடைபெற்றது. இதில் பக்தர்கள் முதுகில் அலகு குத்தி தேர் மற்றும் ஆட்டோ, வேன் ஆகியவைகளை இழுத்து சென்றனர். இரவு சாமி ஊர்வலம் நடைபெற்றது. இதில் ஏராளமான பக்தர்கள் கலந்துகொண்டு சாமி தரிசனம் செய்தனர்.
இதேபோல் அனந்தபுரம் சுப்பிரமணிய சுவாமி மற்றும் குறிஞ்சிப்பை சுப்பிரமணிய சாமி ஆகிய கோவில்களில் தைப்பூச விழா வெகு விமரிசையாக நடைபெற்றது.
