திருப்பூர்:
ஒருங்கிணைந்த பள்ளிக் கல்வித் திட்டத்தின் கீழ் மூலனூர், குண்டடம் மாதிரி மேல்நிலைப் பள்ளிகளில் ஆசிரியர் அல்லாத பணியிடங்களுக்கு ஒப்பந்த அடிப்படையில் பணியாற்ற தகுதியான நபர்கள் விண்ணப்பிக்கலாம் என தெரிவிக்கப்பட்டுள்ளது.
இதுகுறித்து திருப்பூர் மாவட்ட கலெக்டர் வினீத் வெளியிட்டுள்ள அறிக்கையில் கூறியிருப்பதாவது:
திருப்பூர் மாவட்டத்தில் ஒருங்கிணைந்த பள்ளிக் கல்வி திட்டத்தின் கீழ் மூலனூர், குண்டடம் மாதிரி மேல்நிலைப்பள்ளிகளில் ஆசிரியர் அல்லாத பணியிடத்தில் முற்றிலும் ஒப்பந்த அடிப்படையில் தொகுப் பூதியத்தில் பணிபுரிய கீழ்க்கண்ட பணிகளுக்கு தகுதியான நபர்கள் விண்ணப்பிக்கலாம்.
இளநிலை உதவியாளர் பணிக்கு 10-ம்வகுப்பு தேர்ச்சி, தமிழ், ஆங்கிலம் தட்டச்சில் தேர்ச்சி, மேல்நிலை அல்லது பட்டப்படிப்பு, கணினியில், அலுவலக மேலாண்மைப் பணிகளில் ஒன்று முதல் 3 ஆண்டுகள் வரையில் அனுபவம் பெற்றிருக்க வேண்டும். இதற்கு ஊதியமாக மாதம் ரூ.6 ஆயிரம் வழங்கப்படும்.
நூலகர் பணிக்கு மேல்நிலைக் கல்வி மற்றும், அலுவலக மேலாண்மைப் பணிகளில் ஒன்று முதல் 3 ஆண்டுகள் தேர்ச்சி பெற்றிருக்க வேண்டும். ஊதியமாக மாதம் ரூ.6 ஆயிரம் வழங்கப்படும். அதேபோல, அலுவலக உதவியாளர்பணிக்கு 8-ம் வகுப்பு தேர்ச்சி பெற்றிருக்க வேண்டும்.
இதற்கு ஊதியமாக மாதம் ரூ.4,500 வழங்கப்படும். தோட்டக்காரர் பணிக்கு 8-ம் வகுப்பு நிறைவு செய்திருப்பதுடன், தமிழில் எழுதப்படிக்க தெரிந்திருக்க வேண்டும். இதற்கு ஊதியமாக மாதம் ரூ.4,500 வழங்கப்படும்.
ஆகவே மேற்கண்ட தகுதியுடைய விண்ணப்பதாரர்கள் அனைத்து சான்றிதழ்களின் நகல்களையும் இணைத்து கீழ்க்கண்ட முகவரிக்கு வருகிற 28-ந் தேதி மாலை 5 மணிக்குள் கிடைக்கும் வகையில் அனுப்ப வேண்டும்.
விண்ணப்பங்களை மாவட்ட ஒருங்கிணைப்பாளர், ஒருங்கிணைந்த பள்ளிக் கல்வி, மாவட்ட திட்ட அலுவலகம், அறை எண் 521, 5வது தளம், மாவட்ட கலெக்டர் அலுவலகம், திருப்பூர் என்ற முகவரிக்கு அனுப்ப வேண்டும். இவ்வாறு தெரிவிக்கப்பட்டுள்ளது.
