மாமல்லபுரம்:
செங்கல்பட்டு மாவட்டம் மாமல்லபுரத்தில் உள்ள கடற்கரை கோவில், ஐந்துரதம், அர்சுனன் தபசு உள்ளிட்ட புராதன சின்னங்கள் யுனெஸ்கோவால் அங்கீகரிக்கப்பட்ட உலக பாரம்பரிய நினைவு சின்னங்களாக திகழ்கிறது. இந்த புராதன சின்னங்களை கண்டுகளிக்க தொல்லியல் துறை உள்நாட்டு சுற்றுலா பயணிகளிடம் ரூ.40-ம், வெளிநாட்டு பயணிகளிடம் ரூ.700-ம் பார்வையாளர் கட்டணமாக வசூலிக்கிறது. இந்தநிலையில் கொரோனா தொற்று தடுப்பு கருதி கடந்த ஆண்டு 9 மாதங்கள், இந்த ஆண்டு 2 மாதங்கள் என மாமல்லபுரம் புராதன சின்னங்கள் மூடப்பட்டன.
இந்தநிலையில் தமிழக அரசு ஊரடங்கு தளர்வை அறிவித்ததை தொடர்ந்து கடந்த 5 மாதங்களாக மாமல்லபுரம் புராதன சின்னங்கள் திறக்கப்பட்டு, வழிகாட்டு நெறிமுறைகளுடன் காலை 10 மணி முதல் மாலை 5 மணி வரை மட்டுமே பார்வையாளர்கள் அனுமதிக்கப்பட்டு வந்தனர்.
தற்போது பயணிகள் வருகை நாளுக்கு நாள் அதிகரித்து வருவதால் மாமல்லபுரம் புராதன சின்னங்களை கூடுதல் நேரம் திறந்து பார்வையாளர் நேரத்தை காலை 6 மணி முதல் மாலை 6 மணி வரை நீட்டிப்பு செய்ய வேண்டும் என்று பொதுமக்களும், சுற்றுலா பயணிகளும் மத்திய தொல்லியல் துறைக்கு கோரிக்கை விடுத்து வந்தனர். இந்த கோரிக்கை குறித்து பரிசீலித்த தொல்லியல்துறை நிர்வாகம் காலை 6 மணி முதல் மாலை 6 மணி வரை புராதன சின்னங்களை பார்க்க அனுமதி அளித்துள்ளது.
நேற்று முதல் இந்த கூடுதல் நேரம் திறப்பு நடைமுறைக்கு வந்துள்ளது. பார்வை நேரம் நீட்டிக்கப்பட்டுள்ளதற்கு சுற்றுலா பயணிகள் வரவற்பு தெரிவித்துள்ளனர்.
