சட்டமன்ற தேர்தலில் முதல்வர் வேட்பாளர் யார் என்பதை பாஜக அறிவிக்கும்- எல்.முருகன் பரபரப்பு பேச்சு

அரியலூர்: 

பாஜக மாநிலத் தலைவர் எல்.முருகன் நிருபர்களுக்கு பேட்டி அளித்தார். அப்போது அவர் கூறியதாவது, 

தமிழக சட்டமன்ற தேர்தலில் முதல்வர் வேட்பாளரை அதிமுக முடிவு செய்தாலும் யார் என்பதை பாஜக தலைமை விரைவில் அறிவிக்கும். சட்டமன்ற தேர்தலில் தற்போதுள்ள கூட்டணியே தொடரும்.

இன்று முதல் 21-ம் தேதி வரை பெரம்பலூர், அரியலூர், தஞ்சாவூர், திருவள்ளூர், நாகை மாவட்டங்களில் 3 நாட்கள் சுற்றுப்பயணம் மேற்கொள்வதாக விவசாயிகள் சந்திப்பு கூட்டத்தில் எல்.முருகன் கூறினார்.

இந்த சுற்று பயணத்தின் போது வேளாண் சட்டங்களில் உள்ள நன்மைகள் விவசாயிகளுக்கு எடுத்துக்கூறி விழிப்புணர்வு ஏற்படுத்தப்படும். தேர்தலை யாருடைய தலைமையில் சந்திப்பது என்பதையும் தேசிய தலைமை தான் முடிவு செய்யும் .

அதிமுக முதல்வர் வேட்பாளராக எடப்பாடி பழனிச்சாமி அறிவிக்கப்பட்டு அவர் தனது தேர்தல் பிரசாரத்தை தொடங்கியுள்ள நிலையில் சட்டமன்ற தேர்தலில் முதல்வர் வேட்பாளர் யார் என்பதை பாஜக தலைமை அறிவிக்கும் என எல்.முருகன் கூறியுள்ள சம்பவம் தமிழக அரசியலில் பரபரப்பை ஏற்படுத்தியுள்ளது.