திருப்பத்தூர்:
கிருஷ்ணகிரியில் இருந்து வேலூர் நோக்கி டிரெய்லர் லாரி சென்றது. வேலூர் விருதம்பட்டை சேர்ந்த துரைராஜ் (வயது 60) என்பவர் டிரெய்லர் லாரியை ஓட்டினார். அவருடன் வேலூரை சேர்ந்த மற்றொரு டிரைவர் வெங்கடேசன் (45) உடன் சென்றார்.
திருப்பத்தூர் மாவட்டம், ஆம்பூர் அருகே உள்ள சின்னகொம்மேஸ்வரம் பகுதி அருகே சென்ற போது டிரைவரின் கட்டுப்பாட்டை இழந்து தறிகெட்டு ஓடிய டிரெய்லர் லாரி சாலையோரம் இருந்த வீட்டிற்குள் புகுந்தது.
இந்தவிபத்தில் டிரைவர் துரைராஜ் சம்பவ இடத்திலேயே பரிதாபமாக உயிரிழந்தார். மேலும் டிரைவர் வெங்கடேசன், வீட்டில் தூங்கிக் கொண்டிருந்த அஸ்மிதா (13), யுகேஷ் (12), சஞ்சய் (6) உள்பட 6 பேர் காயம் அடைந்தனர்.
இதுகுறித்து தகவல் அறிந்ததும் ஆம்பூர் தாலுக்கா போலீசார் சம்பவ இடத்திற்கு சென்று காயம் அடைந்த 6 பேரையும் மீட்டு சிகிச்சைக்காக ஆம்பூர் அரசு மருத்துவமனைக்கு அனுப்பி வைத்தனர்.
மேலும் லாரியின் முன்பக்கத்தில் சிக்கியிருந்த லாரி டிரைவரின் உடலை நீண்ட நேரத்திற்கு பிறகு மீட்கப்பட்டு பிரேத பரிசோதனைக்காக மருத்துவமனைக்கு அனுப்பி வைத்தனர். மேலும் போலீசார் வழக்குப்பதிவு செய்து விசாரணை நடத்தினர்.
