அரியலூர் அருகே வீட்டின் பூட்டை உடைத்து நகை- பணம் திருட்டு

அரியலூர் மாவட்டம் வி.கைகாட்டி அருகே உள்ள காட்டுப்பிரிங்கியம் பாலக்கரை கிராமத்தை சேர்ந்தவர் சேகர் மனைவி அமுதா(வயது 40). கூலிதொழிலாளி. இந்நிலையில் நேற்று முன்தினம் காலை வழக்கம் போல் அமுதா, அவரது கணவர் சேகர் 2 பேரும் கூலிவேலைக்கு சென்று விட்டனர். பின்னர் மதியம் வந்து பார்த்தபோது வீட்டு கதவின் பூட்டு உடைந்திருந்ததை பார்த்து அதிர்ச்சியடைந்தனர். இதையடுத்து வீட்டின் உள்ளே சென்று பார்த்தபோது பீரோ உடைக்கப்பட்டு உள்ளே வைத்திருந்த 1½ பவுன் தங்க சங்கிலி மற்றும் ரூ.1,000 திருடுபோய் இருப்பது தெரிந்தது.

பின்னர் இதுகுறித்து கயர்லாபாத் போலீஸ் நிலையத்தில் அமுதா புகார் அளித்தார். புகாரின் பேரில் போலீஸ் சப்-இன்ஸ்பெக்டர் சேகர் வழக்குப்பதிந்து நகை மற்றும் பணத்தை திருடி சென்ற மர்மநபர்களை வலைவீசி தேடி வருகின்றனர்.