வடமதுரை:
திண்டுக்கல் அருகே உள்ள அய்யலூரைச் சேர்ந்தவர் ஹரிகிருஷ்ணன். தனியார் நிறுவனத்தில் வேலை பார்த்து வருகிறார். இவரது மனைவி பத்மாவதி (வயது 54). இவர் குப்பம்பட்டியில் உள்ள சத்துணவு மையத்தில் பணியாளராக வேலை பார்த்து வந்தார்.
இவரது மகள் மல்லிகா (31) என்பவருக்கும் சரவணக்குமாருக்கும் கடந்த சில வருடங்களுக்கு முன்பு திருமணம் நடந்தது. சரவணக்குமார் வேலைக்கு செல்லாமல் தனது மனைவியிடம் அடிக்கடி பணம் வாங்கி செலவு செய்து வந்தார். மேலும் அக்கம் பக்கத்திலும் கடன் வாங்கி இருந்தார். இதனால் கணவன்-மனைவி இடையே அடிக்கடி தகராறு ஏற்பட்டது. மல்லிகா கோபித்துக் கொண்டு தனது தாய் வீட்டில் தங்கி இருந்தார்.
கடந்த சில நாட்களாகவே சரவணக்குமார் தனது மாமியாரிடம் சென்று எனது மனைவியை என் வீட்டுக்கு அனுப்பி வை என தகராறு செய்தார். இதனால் அவர்களுக்குள் அடிக்கடி வாக்குவாதம் ஏற்பட்டு வந்தது.
மேலும் பத்மாவதியையும் சரவணக்குமார் தாக்கி மிரட்டி வந்தார். உடல் நிலை பாதிக்கப்பட்டு விடுப்பில் இருந்த பத்மாவதியை சரவணக்குமார் நேற்று கடுமையாக தாக்கி கீழே தள்ளினார்.
இதில் அவரது தலை மற்றும் உடலில் பலத்த காயம் ஏற்பட்டு மயங்கி விழுந்தார். மல்லிகா தனது தாயாரை திண்டுக்கல் அரசு ஆஸ்பத்திரிக்கு சிகிச்சைக்கு அழைத்து வந்தார். ஆனால் அங்கு சிகிச்சை பலனின்றி உயிரிழந்தார்.
இது குறித்து மல்லிகா வடமதுரை போலீஸ் நிலையத்தில் தனது கணவர் தாக்கியதால்தான் தாய் இறந்து விட்டார் என கூறினார். அதன் பேரில் போலீசார் சரவணக்குமாரிடம் விசாரணை நடத்தி வருகின்றனர். #tamilnews
