செவ்வாப்பேட்டை:
செவ்வாப்பேட்டையை அடுத்துள்ள வேப்பம்பட்டு, அம்பத்தூர் பகுதிகளில் உள்ள செல்போன் கோபுரங்களில் இருந்து பேட்டரிகள் திருட்டு போயின.
இதுபற்றி வந்த புகார்களின் அடிப்படையில் செவ்வாய்பேட்டை போலீ சார் வழக்குப்பதிவு செய்து விசாரித்து வந்தனர். அந்த பகுதியில் இருக்கும் செல்போன் கோபுரங்களை தீவிரமாக கண்காணித்து வந்தனர்.
நேற்று செவ்வாய்பேட்டை போலீஸ் இன்ஸ்பெக்டர் முருகன் தலைமையில் போலீசார் கண்காணிப்பு பணியில் ஈடுபட்டனர். அப்போது வாலிபர் ஒருவர் அங்குள்ள ஒரு செல்போன் கோபுரத்தில் ஏற முயன்றார்.
இதையடுத்து போலீசார் அந்த வாலிபரை நெருங்கினார்கள். ஆனால் அதற்குள் அவர் ஓடத் தொடங்கினார். அவரை விரட்டிச் சென்று மடக்கிப் பிடித்தனர்.
விசாரணையில் அவருடைய பெயர் பால்ராஜ் (29) பட்டாபிராம் காந்தி நகரைச் சேர்ந்தவர். இவர்தான் செல்போன் கோபுரங்களில் பேட்டரி திருடி வந்தார் என்பது தெரிய வந்தது. இதையடுத்து அவர் கைது செய்யப்பட்டார்.
கைதான பால்ராஜை போலீசார் அழைத்துச் சென்று அவருடைய வீட்டில் சோதனையிட்டனர். அப்போது ரூ.3 லட்சம் மதிப்புள்ள செல்போன் கோபுர பேட்டரிகள் இருப்பது தெரிய வந்தது.
அவற்றை பறிமுதல் செய்தனர். வாலிபர் பால்ராஜ் மீது வழக்குப்பதிவு செய்யப்பட்டுள்ளது. இவருக்கு வேறு யாருடனும் தொடர்பு உள்ளதா? இதுவரை திருடிய பாட்டரிகள் எத்தனை? அவற்றை எங்கு விற்பனை செய்தார்? என்பது குறித்து தொடர்ந்து விசாரணை நடந்து வருகிறது.
