குரூப்-4 தேர்வுக்கான 4-ம் கட்ட கலந்தாய்வு 9-ந்தேதி நடைபெறும் - தமிழ்நாடு அரசு பணியாளர் தேர்வாணையம்

சென்னை:

தமிழ்நாடு அரசு பணியாளர் தேர்வாணையம் வெளியிட்டுள்ள செய்திக்குறிப்பில் கூறப்பட்டுள்ளதாவது:-

குரூப்-4 2015-16-ல் அடங்கிய இளநிலை உதவியாளர், வரைவாளர், நில அளவர், தட்டச்சர் பதவிகளுக்கு நேரடி நியமனம் செய்யும் பொருட்டு தமிழ்நாடு அரசுப் பணியாளர் தேர்வாணையம் கடந்த 2016-ம் ஆண்டு நவம்பர் மாதம் 6-ந்தேதி எழுத்துத்தேர்வு நடத்தியது. அதற்கான தேர்வு முடிவுகள் 2017-ம் ஆண்டு பிப்ரவரி மாதம் 21-ந்தேதி வெளியிடப்பட்டது. இந்த தேர்வு தொடர்பான இளநிலை உதவியாளர் பதவிக்கான 6 காலிப்பணியிடங்கள் மற்றும் தட்டச்சர் பதவிக்கான 2 காலிப்பணியிடங்களை நிரப்பும் பொருட்டு வருகிற 9-ந்தேதி 4-ம் கட்ட சான்றிதழ் சரிபார்த்தல் மற்றும் கலந்தாய்வு சென்னையில் உள்ள தமிழ்நாடு அரசுப் பணியாளர் தேர்வாணைய அலுவலகத்தில் நடைபெற உள்ளது.

சான்றிதழ் சரிபார்ப்பு மற்றும் கலந்தாய்விற்கான தேதி, நேரம் குறிப்பிடப்பட்ட அழைப்புக் கடிதம் விரைவு அஞ்சல், எஸ்.எம்.எஸ். மற்றும் இ-மெயில் மூலமும் தனியாக அனுப்பப்பட்டுள்ளது. விண்ணப்பதாரர்கள் பெற்றுள்ள மதிப்பெண்கள், தரவரிசை எண் மற்றும் கணினிவழி விண்ணப்பத்தில் அளித்துள்ள தகவல்கள் அடிப்படையில் சான்றிதழ் சரிபார்ப்பு மற்றும் கலந்தாய்விற்கு 1:5 என்ற விகிதத்தில் அழைக்கப்பட்டுள்ளனர். எனவே சான்றிதழ் சரிபார்ப்பு மற்றும் கலந்தாய்விற்கு அழைக்கப்பட்டதாலேயே அவர் அப்பதவிக்கு தேர்வு செய்யப்பட்டதாக உரிமம் கோர இயலாது. விண்ணப்பதாரர்கள் சான்றிதழ் சரிபார்ப்பு மற்றும் கலந்தாய்விற்கு குறித்த நேரத்தில் வரத்தவறினால் அவர்களுக்கு மறுவாய்ப்பு அளிக்கப்படமாட்டாது.

இவ்வாறு அதில் கூறப்பட்டுள்ளது.