2018 மாருதி சுசுகி ஸ்விஃப்ட்: முன்பதிவுகள் துவங்கின

புதுடெல்லி:

இந்தியாவில் மாருதி சுசுகி 2018 ஸ்விஃப்ட் மாடலுக்கான முன்பதிவுகளை சில விற்பனையாளர்கள் இம்மாத முதல் வாரத்தில் துவங்கியதாக தகவல் வெளியானது. 

இந்த ஆண்டு நடைபெற இருக்கும் ஆட்டோ எக்ஸ்போ விழாவில் அறிமுகம் செய்யப்பட இருக்கும் ஸ்விஃப்ட் 2018 முன்பதிவுகள் அதிகாரப்பூர்வமாக துவங்கியுள்ளது. நாடு முழுக்க புதிய ஸ்விஃப்ட் மாடலுக்கான முன்பதிவு செய்ய வாடிக்கையாளர்கள் ரூ.11,000 செலுத்த வேண்டும்.

புதிய 2018 ஸ்விஃப்ட் பிப்ரவரி மாத இறுதியிலோ அல்லது மார்ச் மாத துவக்கத்திலோ விற்பனைக்கு வரும் என்றும் இதற்கான காத்திருப்பு நேரம் 3 அல்லது 4 மாதங்கள் வரை இருக்கும் என எதிர்பார்ப்பதாக சில விற்பனையாளர்கள் தெரிவித்துள்ளனர். புதிய ஸ்விஃப்ட் மாடல் மாருதி சுசுகியின் HEARTECT வடிவைப்பை தழுவி உருவாக்கப்பட்டுள்ளது.

மூன்றாம் தலைமுறை ஸ்விஃப்ட் மாடலில் 1.2 லிட்டர் பெட்ரோல் மற்றும் 1.3 லிட்டர் டர்போசார்ஜ்டு டீசல் இன்ஜின் வழங்கப்படுகிறது. இதன் பெட்ரோல் மாடல் 82 பி.எச்.பி. பவர் மற்றும் 112 என்.எம். டார்கியூ மற்றும் 74 பி.எச்.பி. பவர் மற்றும் 190 என்.எம். டார்கியூ செயல்திறன் கொண்டிருக்கும். புதிய ஸ்விஃப்ட் பெட்ரோல் மற்றும் டீசல் இன்ஜின்களிலும் 5- ஸ்பீடு கியர்பாக்ஸ் வழங்கப்படலாம்.

புதிய ஸ்விஃப்ட் CNG மற்றும் LPG போன்று மாற்று எரிசக்தி கொண்ட மாடல்கள் வெளியிடப்படாது என கூறப்படுகிறது. இதன் விலை பலேனோ மற்றும் புதிய டிசையர் போன்ற மாடல்களை விட விலை குறைவாக நிர்ணயம் செய்யப்படலாம் என எதிர்பார்க்கப்படுகிறது. மாருதி சுசுகி ஸ்விஃப்ட் 2018 இந்தியாவில் ஹூன்டாய் கிரான்ட் i10, ஃபோர்டு ஃபிகோ உள்ளிட்ட மாடல்களுக்கு போட்டியாக அமையும் என எதிர்பார்க்கப்படுகிறது. 

இந்தியாவில் 2018 மாருதி சுசுகி ஸ்விஃப்ட் விலை ரூ.4.99 லட்சம் (எக்ஸ்-ஷோரூம், டெல்லி) முதல் துவங்கலாம் என்றும் டாப்-எண்ட் மாடல் ZDi டீசல் விலை ரூ.7.99 லட்சம் (எக்ஸ்-ஷோரூம், டெல்லி) வரை நிர்ணயம் செய்யப்படலாம் என எதிர்பார்க்கப்படுகிறது.