இந்தியாவில் பஜாஜ் டாமினர் 400 விலை நான்காவது முறையாக உயர்த்தப்பட்டுள்ளது. முன்னதாக ஜூலை மாதத்தில் டாமினர் 400 விலை அதிகரிக்கப்பட்டது குறிப்பிடத்தக்கது.
பஜாஜ் ஆட்டோ நிறுவனம் டாமினர் 400 மோட்டார்சைக்கிளை ஏ.பி.எஸ். மற்றும் நான் ஏ.பி.எஸ். என இருவித மாடல்களில் அறிமுகம் செய்தது. எனினும், ஏ.பி.எஸ். இல்லாத மாடலின் விற்பனை குறைந்ததால், அதன் விற்பனை நிறுத்தப்பட்டு, தற்சமயம் டாமினர் 400 ஏ.பி.எஸ். வேரியன்ட் மட்டும் விற்பனை செய்யப்படுகிறது.
இம்முறை பஜாஜ் டாமினர் 400 ஏ.பி.எஸ். மாடலின் விலை ரூ.1000 உயர்த்தப்பட்டு தற்சமயம் 1.63 லட்சம் (எக்ஸ்-ஷோரூம்,, டெல்லி) என நிர்ணயம் செய்யப்பட்டுள்ளது. பஜாஜ் டாமினர் 400 மோட்டார்சைக்கிள் இந்தியாவில் 2016 டிசம்பரில் ரூ.1.36 லட்சம் (எக்ஸ்-ஷோரூம், டெல்லி) விலையில் வெளியிடப்பட்டது.
இந்தியாவில் இந்த ஆண்டு ஜனவரி மாதத்தில் பஜாஜ் டாமினர் 2018 எடிஷன் புதிய நிறம் மற்றும் தங்க நிறத்தாலான அலாய் வீல்களுடன் வெளியிடப்பட்டது. எனினும் மோட்டார்சைக்கிளின் மெக்கானிக்கல் அம்சங்களில் எவ்வித மாற்றங்களும் மேற்கொள்ளப்படவில்லை.
பஜாஜ் டாமினர் 400 மாடலில் 373சிசி சிங்கிள் சிலிண்டர், லிக்விட் கூல்டு, ஃபியூயல் இன்ஜெக்டெட் இன்ஜின் வழங்கப்பட்டுள்ளது. இந்த இன்ஜின் 35 பி.ஹெச்.பி. பவர், 35 என்.எம். டார்கியூ மற்றும் 6-ஸ்பீடு கியர்பாக்ஸ் கொண்டுள்ளது. டாமினர் 400 மாடலில் ஃபுல் எல்இடி ஹெட்லைட், டிஜிட்டல் இன்ஸ்ட்ரூமென்ட் கிளஸ்டர், டிஸ்க் பிரேக், ஸ்லிப்பர் கிளட்ச், டூயல் சேனல்-ஏ.பி.எஸ். உள்ளிட்டவை வழங்கப்படுகிறது.
டாமினர் 400 விலை அதிகரிக்கப்பட்ட நிலையில் இந்திய சந்தையில் மாதம் 1000 யூனிட்களை தற்சமயம் விற்பனை செய்யும் பஜாஜ், விரவைில் 10,000 யூனிட்கள் விற்பனை செய்ய இலக்கு நிர்ணயம் செய்துள்ளது. வெளிநாடுகளில் பஜாஜ் டாமினர் 400 நல்ல வரவேற்பை பெற்று வருகிறது.
