பஜாஜ் ஆட்டோ நிறுவனத்தின் பல்சர் என்.எஸ். 160 மாடலின் புதிய வேரியன்ட் யூடியூபில் வெளியாகியுள்ளது. மோட்டார்சைக்கிளின் பின்புறம் டிஸ்க் பிரேக் கொண்டிருக்கிறது. இத்துடன் மோட்டார்சைக்கிளின் பின்புறம் புதிய அலாய் வீல் வழங்கப்பட்டிருக்கிறது. இதேபோன்ற அமைப்பு பல்சர் 150 மாடலில் வழங்கப்பட்டிருந்தது குறிப்பிடத்தக்கது.
மெக்கானிக்கல் அம்சங்களில் எவ்வித மாற்றங்களும் மேற்கொள்ளப்படாத நிலையில், புதிய மாடலிலும் 160.3சிசி, 4-வால்வ், சிங்கிள் சிலின்டர் இன்ஜின் வழங்கப்படலாம் என தெரிகிறது. இந்த இன்ஜின் 15.5 பி.எஸ்., 14.6 என்.எம். டார்கியூ மற்றும் 5-ஸ்பீடு கியர்பாக்ஸ் கொண்டுள்ளது.
142 கிலோ எடை கொண்டிருக்கும் இந்த மோட்டார்சைக்கிள் பல்சர் என்.எஸ்.200 மாடலில் வழங்கப்பட்டுள்ளதை போன்ற கிராடிள் ஃபிரேம் கொண்டிருக்கிறது. முன்புறம் டெலிஸ்கோபிக் ஃபோர்க், பின்புறம் மோனோஷாக் சஸ்பென்ஷன் மற்றும் பின்புறம் 230மில்லிமீட்டர் யூனிட் டிஸ்க் பிரேக் கொண்டிருக்கும்.
இந்தியாவில் பல்சர் என்.எஸ்.160 அதிக பிரபலமான மாடலாக இருக்கும் நிலையில், ஏ.பி.எஸ். பாதுகாப்பு அதன் விற்பனையை மேலும் அதிகரிக்கும் என எதிர்பார்க்கப்படுகிறது. ஏ.பி.எஸ். வசதி சேர்க்கப்படும் பட்சத்தில் புதிய மாடலின் விலை அதிகமாக நிர்ணயம் செய்யப்படலாம்.
பஜாஜ் பல்சர் என்.எஸ். 160 டி.வி.எஸ். அபாச்சி ஆர்.டி.ஆர். 160 4வி, ஹோன்டா சி.பி. ஹார்னெட் மற்றும் சுசுகி ஜிக்சர் போன்ற மாடல்களுக்கு போட்டியாக அமைகிறது. புதிய வேரியன்ட் விலை குறித்து இதுவரை எவ்வித தகவலும் வெளியாகாத நிலையில், தற்போதைய மாடலை விட ரூ.2500 முதல் ரூ.3000 வரை அதிகமாக நிர்ணயம் செய்யபடலாம். #bajajauto #motorcycle
