உருளைக்கிழங்கு பருப்பு உருண்டைக் குழம்பு

தேவையான பொருட்கள் :  

உருளைக்கிழங்கு - 3,
நல்லெண்ணெய் - 2 டீஸ்பூன்,
கடலைப்பருப்பு - 50 கிராம்,
துவரம்பருப்பு - ஒரு டேபிள்ஸ்பூன்,
தக்காளி - 1,
காய்ந்த மிளகாய் - 3,
பூண்டு - 5 பல்,
சின்னவெங்காயம் - 30 கிராம்,
புளி  - அரை எலுமிச்சை அளவு,  
பூண்டு - 1 டேபிள்ஸ்பூன்,
மஞ்சள்தூள் - சிறிதளவு,
சோம்பு - ஒரு டீஸ்பூன்,
மல்லித்தூள் (தனியாத்தூள்) - ஒரு டீஸ்பூன்,
மிளகாய்த்தூள் - ஒரு டீஸ்பூன்,
கறிவேப்பிலை - சிறிதளவு,
கொத்தமல்லித்தழை - சிறிதளவு,
உப்பு - தேவையான அளவு.



செய்முறை :

பூண்டு, சின்ன வெங்காயம், தக்காளியை பொடியாக நறுக்கி கொள்ளவும்.

புளியை நன்றாக கரைத்து கொள்ளவும்.

உருளைக்கிழங்கை வேக வைத்து தோல் நீக்கி மசித்து கொள்ளவும்

கடலைப்பருப்பு, துவரம்பருப்பை நன்றாக கழுவி ஒரு மணி நேரம் ஊறவைத்து பிறகு பூண்டு, காய்ந்த மிளகாய், சோம்பு, கொத்தமல்லித்தழை, உப்பு சேர்த்து கொரகொரவென தண்ணீர் விடாமல் அரைத்து கொள்ளவும்.

அரைத்த மாவில் மசித்த உருளைக்கிழங்கு, வெங்காயத்தைச் சேர்த்து சிறுசிறு உருண்டைகளாக பிடித்து வைக்கவும்.

கடாயில் எண்ணெய் ஊற்றி சூடானதும் உருட்டி வைத்த உருண்டைகளை போட்டு பொரித்து எடுக்கவும்.

வாணலியில் எண்ணெய் விட்டு நறுக்கிய வெங்காயத்தை சேர்த்து வதக்கவும்.

வெங்காயம் நன்றாக வதங்கியதும் தக்காளி, பூண்டு சேர்த்து வதக்கவும்.

அனைத்தும் நன்றாக வதங்கியதும் கறிவேப்பிலை சேர்த்து வதக்கவும்.

இத்துடன் மல்லித்தூள், மஞ்சள்தூள், மிளகாய்த்தூள் சேர்த்து வதக்கவும்.

சிறிது தண்ணீர்விட்டுக் கொதிக்கவிட்டு, உப்பு, கெட்டியாகக் கரைத்த புளித்தண்ணீர் சேர்த்துக் கொதிக்கவிடவும்.

கொதி வரும்போது பொரித்த உருண்டையையும் குழம்பில் சேர்த்து கொத்தமல்லி தழை தூவி அடுப்பை அணைத்து விடவும்.