search icon
என் மலர்tooltip icon

    கிரிக்கெட்

    மகளிர் பிரீமியர் லீக் பைனலுக்கு முன்னேறியது மும்பை... எலிமினேட்டர் சுற்றில் உ.பி.வாரியர்ஸ் தோல்வி
    X

    மகளிர் பிரீமியர் லீக் பைனலுக்கு முன்னேறியது மும்பை... எலிமினேட்டர் சுற்றில் உ.பி.வாரியர்ஸ் தோல்வி

    • முதலில் ஆடிய மும்பை இந்தியன்ஸ் அணி 4 விக்கெட் இழப்பிற்கு 182 ரன்கள் குவித்தது.
    • அடுத்து ஆடிய உ.பி. வாரியர்ஸ் அணி 17.4 ஓவர்களில் 110 ரன்களுக்கு ஆல் அவுட் ஆனது.

    மும்பை:

    மகாராஷ்டிர மாநிலம் மும்பையில் நடைபெற்று வரும் முதலாவது மகளிர் பிரீமியர் லீக் 20 ஓவர் கிரிக்கெட் தொடர் இறுதிக்கட்டத்தை நெருங்கி உள்ளது. 5 அணிகள் பங்கேற்ற இந்த போட்டியில் லீக் சுற்று முடிவில் டெல்லி கேப்பிட்டல்ஸ் முதலிடத்தை பிடித்து நேரடியாக இறுதிப்போட்டிக்கு முன்னேறியது.

    இறுதிப்போட்டியில் டெல்லி அணியுடன் மோதும் அணியை முடிவு செய்வதற்கான எலிமினேட்டர் சுற்று ஆட்டம் இன்று நடைபெற்றது. இதில் மும்பை இந்தியன்ஸ், உ.பி. வாரியர்ஸ் அணிகள் மோதின.

    முதலில் பேட்டிங் செய்த மும்பை இந்தியன்ஸ் அணி, 20 ஓவர் முடிவில் 4 விக்கெட் இழப்பிற்கு 182 ரன்கள் குவித்தது. அதிரடியாக ஆடிய நாட் ஷிவர் பிரன்ட் 72 ரன்கள் (நாட் அவுட்) விளாசினார்.

    இதையடுத்து 183 ரன்கள் எடுத்தால் வெற்றி என்ற இலக்குடன் களமிறங்கிய உ.பி.வாரியர்ஸ் அணி, மும்பை அணியின் பந்துவீச்சை சமாளிக்க முடியாமல் திணறியது. டாப் ஆர்டர் வீராங்கனைகள் விரைவில் ஆட்டமிழந்தனர். 56 ரன்கள் எடுப்பதற்குள் 4 விக்கெட்டுகளை இழந்த நிலையில், கிரண் நவ்கிரே, தீப்தி சர்மா ஜோடி அணியை சரிவில் இருந்து மீட்க போராடியது.

    அதிரடி ஆட்டத்தை வெளிப்படுத்திய கிரண், 27 பந்துகளில், 4 பவுண்டரி, 3 சிக்சருடன் 43 ரன்கள் விளாசிய நிலையில், இஸ்சி வாங் பந்தில் ஆட்டமிழந்தார். அடுத்து களமிறங்கிய சிம்ரன் ஷாயிக், சோபி எக்லெஸ்டோன் ஆகிய இருவரும் அடுத்தடுத்த பந்துகளில் டக் அவுட் ஆகி அதிர்ச்சி அளித்தனர். இதன்மூலம் வாங் ஹாட்ரிக் விக்கெட் எடுத்தார்.

    தீப்தி சர்மா 16 ரன், அஞ்சலி சர்வானி, ராஜேஸ்வரி கயாக்வாட் தலா 5 ரன்னில் ஆட்டமிழக்க, உ.பி. வாரியர்ஸ் அணி, 17.4 ஓவர்களில் 110 ரன்களுக்கு ஆல் அவுட் ஆனது. இதனால் மும்பை இந்தியன்ஸ் அணி 72 ரன்கள் வித்தியாசத்தில் வெற்றி பெற்று இறுதிப்போட்டிக்கு முன்னேறியது. இஸ்சி வாங் 4 விக்கெட்டுகளை கைப்பற்றி அசத்தினார்.

    Next Story
    ×