தமிழில் எந்திரன், சண்டக்கோழி, சாமி, விஸ்வரூபம், வேலை இல்லா பட்டதாரி, மாரி உள்ளிட்ட படங்களின் 2-ம் பாகங்கள் வந்துள்ளன. சிங்கம், அரண்மனை படங்களின் மூன்றாம் பாகங்களும் வெளியாகி உள்ளன. தற்போது இந்தியன் 2-ம் பாகம் தயாராகி வருகிறது.
வெற்றி மாறன் இயக்கத்தில் தனுஷ் நடித்து 2018-ல் வெளியான வடசென்னை 2-ம் பாகம் உருவாக இருப்பதாக கூறப்பட்டது. ஆனாலும் படப்பிடிப்பை தொடங்கவில்லை. இதனால் வடசென்னை 2-ம் பாகம் உருவாகுமா அல்லது கைவிடப்படுமா என்ற கேள்விகள் எழுந்தன.
இந்நிலையில் இயக்குனர் வெற்றி மாறன் தனது இயக்கத்தில் தற்போது விடுதலை, வாடிவாசல் ஆகிய படங்களின் படப்பிடிப்புகள் நடந்து வருவதாகவும் இந்த படங்களை முடித்த பிறகு வடசென்னை 2-ம் பாகத்துக்கான படப்பிடிப்பு தொடங்கும் என்றும் தெரிவித்துள்ளார். இது தனுஷ் ரசிகர்களை உற்சாகப்படுத்தி உள்ளது.
தனுஷ் தற்போது திருச்சிற்றம்பலம், நானே வருவேன் ஆகிய படங்களில் நடித்து முடித்துள்ளார். தற்போது தமிழ், தெலுங்கில் தயாராகும் வாத்தி படத்தில் நடித்து வருகிறார் என்பது குறிப்பிடத்தக்கது.
