லம்போர்கினி நிறுவனம் இந்திய சந்தையில் புதிதாக ஹூரகேன் டெக்னிகா மாடலை அறிமுகம் செய்தது. புதிய லம்போர்கினி காரின் விலை ரூ. 4 கோடியே 04 லட்சம், எக்ஸ்-ஷோரூம் என நிர்ணயம் செய்யப்பட்டு உள்ளது. இருவர் மட்டும் பயணிக்கக்கூடிய இந்த கார் பந்தய கள பயன்பாட்டை கருத்தில் கொண்டு உருவாக்கப்பட்டது ஆகும்.
முன்னதாக இந்த ஆண்டு ஏப்ரல் மாத வாக்கில் இந்த கார் அறிமுகம் செய்யப்பட்டது. தற்போது அறிமுகமாகி இருக்கும் வேரியண்ட் ஹூரகேன் இவோ RWD மற்றும் ஹூரகேன் STD மாடல்களின் இடையில் நிலை நிறுத்தப்பட்டு இருக்கிறது. புதிய லம்போர்கினி ஹூரகேன் டெக்னிகா மாடலில் 5.2 லிட்டர் வி10 என்ஜின் வழங்கப்பட்டு உள்ளது. இந்த என்ஜின் 640 ஹெச்பி பவர், 565 நியூட்டன் மீட்டர் டார்க் இழுவிசையை வெளிப்படுத்துகிறது.
இந்த என்ஜினுடன் 7 ஸ்பீடு டூயல் கிளட்ச் ஆட்டோமேடிக் டிரான்ஸ்மிஷன் வழங்கப்பட்டு இருக்கிறது. காரின் ஒட்டுமொத்த டிரைவிங் அனுபவத்தை மேம்படுத்தும் வகையில், இந்த கார் ஸ்டிராடா, ஸ்போர்ட் மற்றும் கோர்சா என மூன்று வித ரைடிங் மோட்களை கொண்டிருக்கிறது. இந்த கார் மணிக்கு 100 கிலோமீட்டர் வேக்ததை 3.2 நொடிகளில் எட்டிவிடும். மணிக்கு அதிகபட்சம் 325 கிலோமீட்டர் வேகத்தில் செல்லும் திறன் கொண்டுள்ளது.
புதிய லம்போர்கினி காரில் 20 இன்ச் அலாய் வீல்கள், கார்பன் பைபர் என்ஜின் கவர், பிக்சட் ரியர் ஸ்பாயிலர், ஸ்போர்டி ரியர் பம்ப்பர், ஹெக்சகன் வடிவ டூயல் எக்சாஸ்ட் டிப்கள் வழங்கப்பட்டு இருக்கிறது. உள்புறம் ஆல் பிளாக் தீம் கொண்டுள்ளது. கூடுதலாக ஓட்டுனர் இருக்கை உயரத்தை அட்ஜஸ்ட் செய்யும் வசதி மற்றும் மேம்பட்ட HMI இண்டர்பேஸ் வழங்கப்பட்டு உள்ளது.
