இந்தியாவில் லெஜண்டர் 4x4 அறிமுகம் செய்த டொயோட்டா

டொயோட்டா கிர்லோஸ்கர் மோட்டார் நிறுவனம் இந்தியாவில் லெஜண்டர் 4x4 மாடலை அறிமுகம் செய்தது. இதன் விலை ரூ. 42.33 லட்சம் ஆகும். ஏற்கனவே அறிமுகம் செய்யப்பட்ட லெஜண்டர் 4x2 மாடல் விலை ரூ. 37.58 லட்சம் என நிர்ணயம் செய்யப்பட்டு இருந்தது. அனைத்து விலைகளும் எக்ஸ்-ஷோரூம் அடிப்படையில் குறிப்பிடப்பட்டு இருக்கிறது.

இந்தியாவில் டொயோட்டா லெஜண்டர் 4x2 மாடல் இந்த ஆண்டு ஜனவரி மாதத்தில் புதிய பார்ச்சூனர் மாடலுடன் அறிமுகம் செய்யப்பட்டது. இதுவரை இந்தியாவில் 2700 லெஜண்டர் யூனிட்களை டொயோட்டா விற்பனை செய்து உள்ளது. 

புதிய லெஜண்டர் மாடலில் 2.8 லிட்டர், 4 சிலிண்டர் டீசல் என்ஜின் வழங்கப்பட்டு உள்ளது. இந்த என்ஜின் 201 பி.ஹெச்.பி. திறன், 500 நியூட்டன் மீட்டர் டார்க் இழுவிசையை வழங்குகிறது. இத்துடன் 6 ஸ்பீடு ஆட்டோமேடிக் கியர்பாக்ஸ் உள்ளது.