டுகாட்டி இந்தியா நிறுவனம் சமீபத்தில் அறிமுகம் செய்த டெசர்ட் எக்ஸ் மோட்டார்சைக்கிள் வினியோகம் இந்திய சந்தையில் ஜனவரி மாதத்தின் இரண்டாவது வாரத்தில் துவங்கும் என அறிவித்து இருக்கிறது. புதிய அட்வென்ச்சர் டூரர் மோட்டார்சைக்கிள் மாடல் ஒற்றை வேரியண்டில் கிடைக்கிறது. இதன் விலை ரூ. 17 லட்சத்து 91 ஆயிரம், எக்ஸ்-ஷோரூம் என துவங்குகிறது.
இந்திய சந்தையில் புதிய டெசர்ட் எக்ஸ் மோட்டார்சைக்கிள் டிரையம்ப் டைகர் 900 ரேலி, ஹோண்டா ஆப்ரிக்கா ட்வின் மற்றும் பிஎம்டபிள்யூ F850 GS மாடல்களுக்கு போட்டியாக அமைகிறது. புது மாடலில் 937சிசி, L-ட்வின், லிக்விட் கூல்டு என்ஜின் வழங்கப்பட்டு இருக்கிறது. இதே என்ஜின் புதிய டுகாட்டி மான்ஸ்டர் மற்றும் மல்டிஸ்டிராடா வி2 மாடல்களிலும் வழங்கப்பட்டு இருக்கிறது.
இந்த என்ஜின் 110 ஹெச்பி பவர், 92 நியூட்டன் மீட்டர் டார்க் இழுவிசையை வெளிப்படுத்தும் திறன் கொண்டிருக்கிறது. அம்சங்களை பொருத்தவரை புதிய டெசர்ட் எக்ஸ் மாடலில் ஃபுல் எல்இடி லைட்டிங், புளூடூத் வசதி கொண்ட ஐந்து இன்ச் டிஎஃப்டி டிஸ்ப்ளே ஸ்டாண்டர்டு அம்சமாக வழங்கப்படுகிறது. இந்த மாடலில்- ஸ்போர்ட், டூரிங், அர்பன், வெட், ரேலி மற்றும் எண்டியுரோ என ஆறு வித ரைடிங் மோட்கள் உள்ளது.
இத்துடன் ஃபுல், ஹை, மீடியம் மற்றும் லோ என நான்கு பவர் மோட்கள் வழங்கப்பட்டு இருக்கிறது. இவற்றுடன் குரூயிஸ் கண்ட்ரோல், போஷ் IMU, என்ஜின் பிரேக் கண்ட்ரோல், டிராக்ஷன் கண்ட்ரோல், வீலி கண்ட்ரோல், பை-டைரெஷனல் குயிக்ஷிஃப்டர் மற்றும் கார்னெரிங் ஏபிஎஸ் போன்ற அம்சங்கள் வழங்கப்பட்டு இருக்கிறது. புதிய டெசர்ட் எக்ஸ் மாடலில் கூடுதலாக ஆப்ஷனல் அக்சஸரீக்கள் வழங்கப்படுகின்றன.
டுகாட்டி இந்தியா நிறுவனம் 2023 ஆண்டு இந்திய சந்தையில் அறிமுகம் செய்ய இருக்கும் புது மோட்டார்சைக்கிள் மாடல்களின் விவரங்களை வெளியிட்டு உள்ளது. இதில் பனிகேல் வி4 ஆர், மான்ஸ்டர் எஸ்பி, டயவெல் வி4, ஸ்டிரீட்ஃபைட்டர் வி4 எஸ்பி2, மல்டிஸ்டிராடா வி4 ரேசி, ஸ்கிராம்ப்ளர் ஐகான் 2ஜி, ஸ்கிராம்ப்ளர் ஃபுல் திராட்டில் 2ஜி, ஸ்கிராம்ப்ளர் நைட்ஷிஃப்ட் 2ஜி மற்றும் ஸ்டிரீட்ஃபைட்டர் வி4 லம்போர்கினி உள்ளிட்டவை இடம்பெற்று இருக்கிறது.
