யமஹா நிறுவனத்தின் ஆர்15 வி3 பி.எஸ். 6 மோட்டார்சைக்கிள் இந்தியாவில் அறிமுகம் செய்யப்பட்டது. புதிய ஆர்15 மாடலின் விலை ரூ. 1.45 லட்சம் (எக்ஸ்-ஷோரூம்) என நிர்ணயம் செய்யப்பட்டுள்ளது. இது பி.எஸ். 4 மாடலின் விலையை விட ரூ. 3000 அதிகம் ஆகும்.
புதிய பி.எஸ்.6 ஆர்15 மாடலின் முன்பதிவு ஏற்கனவே துவங்கிவிட்ட நிலையில், இதன் விநியோகம் டிசம்பர் மாத மூன்றாவது வாரத்தில் துவங்கும் என கூறப்படுகிறது. இந்திய சந்தையில் யமஹா ஆர்15 மோட்டார்சைக்கிள் 2008 ஆம் ஆண்டு அறிமுகம் செய்யப்பட்டது.
அறிமுகமான காலக்கட்டத்தில் இந்தியாவின் சக்திவாய்ந்த 150சிசி மோட்டார்சைக்கிள் என்ற பெருமையை பெற்று இருந்தது. அறிமுகமானது முதல் பலமுறை அப்டேட் செய்யப்பட்ட நிலையில், தற்சமயம் இந்த மாடலுக்கு பி.எஸ். 6 ரக என்ஜின் வழங்கப்பட்டுள்ளது.
புதிய ஆர்15 வி3 பி.எஸ்.6 மாடலில் 155சிசி சிங்கிள் சிலிண்டர் என்ஜின் வழங்கப்பட்டுள்ளது. இந்த என்ஜின் 18.3 பி.ஹெச்.பி. பவர், 14.1 என்.எம். டார்க் செயல்திறன் வழங்குகிறது. இத்துடன் 6-ஸ்பீடு கியர்பாக்ஸ் வழங்கப்பட்டு இருக்கிறது.
புதிய மோட்டார்சைக்கிளின் முன்புறம் ட்வின் எல்.இ.டி. ஹெட்லேம்ப்கள், ஃபாக்ஸ் ரேம் ஏர் இன்டேக் வழங்கப்பட்டுள்ளது. பக்கவாட்டில் கூர்மையான மற்றும் ஸ்போர்ட் ஃபேரிங் கொண்டிருக்கிறது. பின்புறம் எல்.இ.டி. டெயில் லேம்ப் மற்றும் பிரத்யேக கவுல் வழங்கப்பட்டுள்ளது.
