ஹூண்டாய் நிறுவனத்தின் மூன்றாம் தலைமுறை எலைட் ஐ20 பிரீமியம் ஹேட்ச்பேக் மாடல் சர்வதேச சந்தையில் ஜெனிவா மோட்டார் விழாவில் அறிமுகம் செய்யப்படலாம் என எதிர்பார்க்கப்பட்டது. எனினும், கொரோனா வைரஸ் பாதிப்பு காரணமாக ஜெனீவா மோட்டார் விழா ரத்து செய்யப்பட்டது.
இதன் காரணமாக ஹூண்டாய் நிறுவனம் மூன்றாம் தலைமுறை ஹேட்ச்பேக் மாடலை ஆன்லைன் விழாவில் அறிமுகம் செய்தது. இதைத் தொடர்ந்து புதிய ஹூண்டாய் காரின் இந்திய வெளியீட்டின் மீது அதிக எதிர்பார்ப்பு எழுந்துள்ளது. தற்சமயம் புதிய கார் இந்திய வெளியீட்டிற்கு முன் அதன் ஸ்பை படங்கள் இணையத்தில் வெளியாகி உள்ளது.
ஸ்பை படங்களில் முழுமையாக மறைக்கப்பட்டுள்ள எலைட் ஐ20 ஹாலோஜன் ஹெட்லேம்ப் கொண்டிருக்கும் என தெரிகிறது. எனினும், இவை தற்காலிகமானவை ஆகும். விற்பனைக்கு வரும் மாடலில் எல்இடி யூனிட்கள் வழங்கப்படலாம். ஐரோப்பிய சந்தையில் இந்த கார் இசட் வடிவ எல்இடி டெயில் லைட்கள் வழங்கப்பட்டுள்ளன.
இத்துடன் புதிய ஹெட்லேம்ப்கள், இருபுறங்களில் புதிய பம்ப்பர்கள், போல்டு கிரீஸ்கள் காரை சுற்றி வழங்கப்பட்டுள்ளது. இதுதவிர புதிய டூயல் டோன் எல்இடி வீல்கள் வழங்கப்பட்டு இருக்கின்றன.
புதிய ஹூண்டாய் எலைட் ஐ20 எலைட் மாடலில் 1.2 லிட்டர் பெட்ரோல் என்ஜின் வழங்கப்படுகிறது. இந்த என்ஜின் 83 பிஹெச்பி வழங்குகிறது. இத்துடன் 100 பிஹெச்பி பவர் வழங்கும் 1.5 லிட்டர் டீசல் யூனிட், 120 பிஹெச்பி பவர் வழங்கும் 1.0 லிட்டர் டர்போ பெட்ரோல் யூனிட் வழங்கப்படுகிறது.
மூன்று என்ஜின்களுடன் மேனுவல் டிரான்ஸ்மிஷன் மற்றும் ஆப்ஷனல் ஆட்டோமேடிக் கியர்பாக்ஸ் வழங்கப்பட்டு இருக்கிறது.
