தொழில்நுட்பச் செய்திகள்
பேஸ்டைம் கேமராவுடன் புது ஹோம்பாட் உருவாக்கும் ஆப்பிள்?
ஆப்பிள் நிறுவனம் சத்தமின்றி புது ஹோம்பாட் மாடலை உருவாக்கும் பணிகளில் ஈடுபட்டு வருவதாக தகவல் வெளியாகி உள்ளது. இது குறித்து தொடர்ந்து பார்ப்போம்.
ஆப்பிள் ஹோம்பாட் ஸ்மார்ட் ஸ்பீக்கர், அடுத்த தலைமுறை மாடலில் மிக முக்கிய புது அம்சம் வழங்கப்பட இருக்கிறது. இதுகுறித்து தற்சமயம் வெளியாகி இருக்கும் தகவல்களில் ஆப்பிள் நிறுவனம் புதிய ஹோம்பாட் மாடலை உருவாக்கி வருவதாக கூறப்படுகிறது. மேலும் இது பில்ட்-இன் கேமரா கொண்ட ஸ்மார்ட் டிஸ்ப்ளே போன்று செயல்படும் என்றும் தகவல் வெளியாகி உள்ளது.
புதிய ஹோம்பாட் ஸ்பீக்கர் பேஸ் ஐடி வசதி கொண்டிருக்கும் என்றும் இது ஆப்பிள் நிறுவனத்தின் சொந்த டி.வி. ஓ.எஸ். கொண்டிருக்கும் என்றும் கூறப்படுகிறது. பேஸ்டைம் உரையாடல்களை இயக்க ஏதுவாக ஆப்பிள் நிறுவனம் தனது ஹோம்பாட் ஸ்பீக்கரில் பில்ட்-இன் கேமராவை வழங்க இருப்பதாகவும் தகவல் வெளியாகி உள்ளது.
டிஸ்ப்ளே, பில்ட்-இன் கேமரா போன்ற அம்சங்களை கொண்டிருப்பதால், அடுத்த தலைமுறை ஹோம்பாட் மாடல் கூகுள் நிறுவனத்தின் கூகுள் நெஸ்ட் ஹப் மேக்ஸ் மற்றும் அமேசான் எக்கோ ஷோ போன்ற மாடல்களுக்கு போட்டியாக அமையும் என தெரிகிறது. இரு மாடல்களிலும் ஸ்மார்ட் ஸ்பீக்கர்கள், டிஸ்ப்ளே, கேமரா மற்றும் வாய்ஸ் அசிஸ்டண்ட் போன்ற அம்சங்கள் வழங்கப்பட்டு இருக்கிறது.
பேஸ் ஐ.டி. வசதியுடன் புது ஹோம்பாட் மாடல் உருவாக்கப்படுவதாக தகவல் வெளியாகி வந்தாலும், இந்த மாடல் எப்போது அறிமுகம் செய்யப்படும் என்பது குறித்து இதுவரை எந்த தகவலும் இல்லை. எனினும், புதிய சாதனத்திற்கான டீசரை ஆப்பிள் நிறுவனம் தனது WWDC நிகழ்வில் அறிமுகம் செய்யலாம் என தெரிகிறது.