செய்திகள்
2வது டெஸ்ட் - இன்னிங்ஸ் மற்றும் 12 ரன் வித்தியாசத்தில் வெஸ்ட் இண்டீசை வீழ்த்தியது நியூசிலாந்து
வெலிங்டனில் நடந்த 2வது டெஸ்டில் ஒரு இன்னிங்ஸ் மற்றும் 12 ரன்கள் வித்தியாசத்தில் வெஸ்ட் இண்டீசை வீழ்த்தி டெஸ்ட் தொடரை கைப்பற்றியது நியூசிலாந்து அணி.
வெலிங்டன்:
நியூசிலாந்து-வெஸ்ட் இண்டீஸ் அணிகள் மோதும் 2-வது மற்றும் கடைசி டெஸ்ட் கிரிக்கெட் போட்டி வெலிங்டனில் நடைபெற்றது.
நியூசிலாந்து அணி முதல் இன்னிங்சில் 460 ரன் குவித்தது. ஹென்றி நிக்கோலஸ் அபாரமாக விளையாடி சதம் அடித்தார். அவர் 174 ரன்னும், வாக்னர் 66 ரன்னும் எடுத்தனர்.
வெஸ்ட் இண்டீஸ் சார்பில் கேப்ரியல் , அல்ஜாரி ஜோசப் தலா 3 விக்கெட்டும், செமர் ஹோல்டர், ரோஸ்டன் சேஸ் தலா 2 விக்கெட்டும் கைப்பற்றினார்கள்.
அடுத்து வெஸ்ட் இண்டீஸ் அணி தனது முதல் இன்னிங்சை தொடங்கியது. நியூசிலாந்து வீரர்களின் பந்துவீச்சை தாக்குப்பிடிக்க முடியாமல் வெஸ்ட் இண்டீஸ் அணி திணறியது.
இதனால் வெஸ்ட் இண்டீஸ் அணி முதல் இன்னிங்சில் 56.4 ஓவர்களில் 131 ரன்னில் சுருண்டு பாலோ ஆன் பெற்றது.
நியூசிலாந்து சார்பில் சவுத்தி, ஜேமிசன் தலா 5 விக்கெட் வீழ்த்தி அசத்தினர்.
பாலோஆன் ஆன வெஸ்ட் இண்டீஸ் 329 ரன்கள் பின்தங்கிய நிலையில் 2-வது இன்னிங்சை தொடர்ந்தது.
நியூசிலாந்து வீரர்களின் அபாரமான பந்துவீச்சால் அந்த அணி 2-வது இன்னிங்சிலும் திணறியது. தொடக்க ஆட்டக்காரர் ஜான் கேம்பெல் 68 ரன்னும், கேப்டன் ஜேசன் ஹோல்டர் 61 ரன்னும், விக்கெட் கீப்பர் ஜோஷ்வா டி சில்வா 57 ரன்னும் எடுத்து ஆட்டமிழந்தனர்.
இறுதியில், வெஸ்ட் இண்டீஸ் அணி இரண்டாவது இன்னிங்சில் 79.1 ஓவரில் 317 ரன்களுக்கு ஆல் அவுட்டானது.
இதனால் நியூசிலாந்து அணி ஒரு இன்னிங்ஸ் மற்றும் 12 ரன்கள் வித்தியாசத்தில் வெற்றி பெற்றது.
நியூசிலாந்து சார்பில் போல்ட், நீல் வாக்னர் தலா 3 விக்கெட்டும், சவுத்தி, ஜேமிசன் தலா 2 விக்கெட்டும் கைப்பற்றினர்.
இந்த வெற்றியின் மூலம் நியூசிலாந்து அணி டெஸ்ட் தொடரை 2-0 என்ற கணக்கில் கைப்பற்றியது. ஆட்ட நாயகனாக ஹென்றி நிகோலசும், தொடர் நாயகனாக ஜேமிசனும் தேர்வு செய்யப்பட்டனர்.
ஏற்கனவே 3 போட்டிகள் கொண்ட டி 20 தொடரை அந்த அணி 2-0 என்ற கணக்கில் வென்றுள்ளது குறிப்பிடத்தக்கது.