இரட்டை சதம், 74 பாயின்ட்: ஐசிசி தரவரிசையில் விராட் கோலியுடன் 2-வது இடத்தை பிடித்தார் கேன் வில்லியம்சன்

நியூசிலாந்து - வெஸ்ட் இண்டீஸ் அணிகளுக்கு இடையிலான முதல் டெஸ்ட் ஹாமில்டனில் நடைபெற்றது. இதில் நியூசிலாந்து இன்னிங்ஸ் வெற்றி பெற்றது. முதல் இன்னிங்சில் நியூசிலாந்து அணி கேப்டன் கேன் வில்லியம்சன் இரட்டை சதம் அடித்ததுடன் 251 ரன்கள் விளாசினார்.

இரட்டை சதம் அடித்ததன் மூலம் ஐசிசி டெஸ்ட் பேட்ஸ்மேன் தரவரிசையில் 74 புள்ளிகள் பெற்று 812 புள்ளிகளில் இருந்து 886 ரன்களுக்கு முன்னேறினார். இதன் மூலம் ஐசிசி தரவரிசையில் 2-வது இடத்தை விராட் கோலியுடன் பகிர்ந்துள்ளார்.

ஸ்டீவ் ஸ்மித் 911 புள்ளிகளுடன் முதல் இடத்தில் உள்ளார். மார்னஸ் லாபஸ்சேன் 827 புள்ளிகளுடன் 4-வது இடத்திலும், பாபர் அசாம் 797 புள்ளிகளுடன் 5-ம் இடத்திலும் உள்ளனர்.

பந்து வீச்சாளர்கள் தரவரிசையில் பேட் கம்மின்ஸ் 904 புள்ளிகளுடன் முதல் இடத்தில் உள்ளார். நீல் வாக்னர் 849 புள்ளிகளுடன் 2-வது இடத்தில் உள்ளார். ஸ்டூவர்ட் பிராட் 845 புள்ளிகளுடன் 3-வது இடத்திலும், டிம் சவுத்தி 817 புள்ளிகளுடன் 4-வது இடத்திலும், காகிசோ ரபடா 802 புள்ளிகளுடன் 5-வது இடத்தில் உள்ளார்.