இந்தியா - ஆஸ்திரேலியா ‘பாக்சிங் டே’ டெஸ்ட் அடிலெய்டுக்கு மாற்றம்?

இந்திய டெஸ்ட் கிரிக்கெட் அணி டிசம்பர் மாதம் ஆஸ்திரேலியாவில் சுற்றுப் பயணம் செய்து நான்கு போட்டிகள் கொண்ட டெஸ்ட் தொடரில் விளையாட இருக்கிறது. இதில் ஒரு டெஸ்ட் டிசம்பர் மாதம் 26-ந்தேதி மெல்போர்ன் கிரிக்கெட் மைதானத்தில் நடைபெற இருக்கிறது.

கிறிஸ்துமஸ் பண்டிகைக்கு அடுத்த நாள் தொடங்கப்படும் இந்த டெஸ்டுக்கு ‘பாக்சிங் டே’ எனப் பெயர். 26-ந்தேதி மெல்போர்ன் மைதானம் முழுவதும் ரசிகர்களால் நிரம்பி காணப்படும்.

தற்போது ஆஸ்திரேலியாவின் விக்டோரியா மாநிலத்தில் கொரோனா தொற்றால் பாதிக்கப்பட்டவர்களின் எண்ணிக்கை அதிகமாக உள்ளது. விக்டோரியா மாநிலத்தில்தான் மெல்போர்ன் மைதானம் அமைந்துள்ளது. தற்போது அங்கு 13 ஆயிரம் பேர் பாதிக்கப்பட்டுள்ள நிலையில், 170 பேர் உயிரிழந்துள்ளனர்.

இதனால் பாதுகாப்பற்ற நிலையில் போட்டியை நடத்தி சுமார் 30 கோடி ஆஸ்திரேலிய டாலரை இழக்க ஆஸ்திரேலியா விரும்பவில்லை. இதனால் அடிலெய்டில் நடத்த விரும்புகிறது. தெற்கு ஆஸ்திரேலியாவின் தலைநகர் அடிலெய்டில் 457 பேர் மட்டுமே பாதிக்கப்பட்டுள்ளனர். இதில் 445 பேர் குணமடைந்துள்ளனர்.

இதனால் போட்டியை அடிலெய்டுக்கு மாற்ற ஆஸ்திரேலியா கிரிக்கெட் போர்டு விரும்புகிறது. இதுகுறித்து விவாதித்து இறுதி முடிவு எடுக்க இருக்கிறது.