பவுன்சர் கிங் ஜாஃப்ரா ஆர்ச்சர் இல்லை என்றாலும் பெரிய வித்தியாசம் இல்லை: டி காக்

தென்ஆப்பிரிக்கா - இங்கிலாந்து அணிகளுக்கு இடையிலான 2-வது டெஸ்ட் கேப் டவுன் நியூலேண்டில் நாளை (3-ந்தேதி) தொடங்குகிறது. ஏற்கனவே, தென்ஆப்பிரிக்கா சென்றதில் இருந்து பெரும்பாலான இங்கிலாந்து வீரர்கள் உடல்நலக்குறைவால் அவதிப்பட்டு வருகின்றனர்.

இந்நிலையில், பயிற்சியின்போது வலது கை முழங்கையில் காயம் ஏற்பட்டுள்ளதால் ஜாஃப்ரா ஆர்ச்சர் நாளைய போட்டியில் விளையாடுவது சந்தேகம் எனக் கூறப்படுகிறது.

போட்டி தொடங்குவதற்கு முன்புதான் ஆர்ச்சர் குறித்து முடிவு எடுப்போம் என இங்கிலாந்து அணி நிர்வாகம் தெரிவித்துள்ளது.

செஞ்சூரியனில் நடைபெற்ற முதல் டெஸ்டில் ஜாஃப்ரா ஆர்ச்சர் பவுன்சர் பந்தால் தென்ஆப்பிரிக்கா பேட்ஸ்மேன்களை அச்சுறுத்தி வந்தார். முதல் இன்னிங்சில் 95 ரன்கள் விளாசிய டி காக்கையும் பவுன்சரால் அச்சுறுத்த நினைத்தார்.

ஆனால் டி காக் ஷாட் பிட்ச் பவுன்சர்களை துணிச்சலாக எதிர்கொண்டு அடுத்தடுத்து சிக்சர்கள் அடித்தார். இதனால் டி காக்  VS ஜாஃப்ரா ஆர்ச்சர் என தொடர் மாறியுள்ளது.

2-வது டெஸ்டிலும் இது தொடரும் என்று எதிர்பார்த்த நிலையில் ஆர்ச்சர் காயம் அடைந்துள்ளார். இதுகுறித்து டி காக் கூறுகையில் ‘‘ஜாஃப்ரா ஆர்ச்சர் காயம் காரணமாக 2-வது போட்டியில் இடம்பெறாவிட்டாலும் மிகப்பெரிய அளவில் வித்தியாசம் ஏதும் இருக்காது’’ எனத் தெரிவித்துள்ளார்.

முன்னணி பேட்ஸ்மேன்கள் திணறிய நிலையில் முதல் இன்னிங்சில் தென்ஆப்பிரிக்கா அணி 103 ரன்கள் முன்னிலை பெற முக்கிய காரணமாக இருந்தார் என்பது குறிப்பிடத்தக்கது.