படுதோல்வி பாகிஸ்தான் கிரிக்கெட்டின் பெருமையை காயப்படுத்தி விட்டது: பாகிஸ்தான் கேப்டன் அசார் அலி

பாகிஸ்தான் ஆஸ்திரேலியாவில் சுற்றுப் பயணம் செய்து இரண்டு போட்டிகள் கொண்ட டெஸ்ட் தொடரில் விளையாடியது. இரண்டு போட்டிகளிலும் பேட்டிங் மற்றும் பந்து வீச்சால் ஆஸ்திரேலியாவுக்கு பாகிஸ்தானால் ஈடுகொடுக்க முடியவில்லை.

இரண்டு போட்டிகளிலும் இன்னிங்ஸ் தோல்வியடைந்தது. இந்நிலையில் ஆஸ்திரேலியாவில் தோல்வியடைந்தது பாகிஸ்தான் கிரிக்கெட் பெருமையை காயப்படுத்தி விட்டது என அந்த அணியின் கேப்டன் அசார் அலி தெரிவித்துள்ளார்.

இதுகுறித்து அசார் அலி கூறுகையில் ‘‘ஆஸ்திரேலியாவுக்கு எதிராக இரண்டு போட்டிகளிலும் நாங்கள் பெற்ற தோல்வியின் விதம் மிகவும் ஏமாற்றம் அளிக்கிறது. ஆஸ்திரேலியா மண்ணில் தோற்றது எங்களது கிரிக்கெட் பெருமையை புண்படுத்தியுள்ளது. இதை ஏற்றுக்கொள்ள கஷ்டமாக உள்ளது.

நாங்கள் ஆஸ்திரேலியாவுக்கு சரியான தயார்படுத்துதலுடனும், நேர்மறையான மனநிலையுடனும்தான் சென்றோம். இரண்டு போட்டிகளிலும் இன்னிங்ஸ் தோல்வி அடைந்தது ஏற்றுக் கொள்ளக்கூடியது அல்ல. இதற்காக நான் சாக்குபோக்கு சொல்ல விரும்பவில்லை’’ என்றார்.