விஜய் ஹசாரே டிராபியில் கேஎல் ராகுல், மணிஷ் பாண்டே அதிரடி ஆட்டம்

விஜய் ஹசாரே டிராபியில் பெங்களூருவில் நடைபெற்ற இன்றைய ஆட்டத்தில் கர்நாடகா - சத்தீஸ்கர் அணிகள் மோதின. டாஸ் வென்ற சத்தீஸ்கர் அணி பீல்டிங் தேர்வு செய்தது. அதன்படி கர்நாடக அணியின் கேஎல் ராகுல், படிக்கல் ஆகியோர் தொடக்க வீரர்களாக களம் இறங்கினர். படிக்கல் 8 ரன்னில் ஆட்டமிழந்தார். அடுத்து வந்த கருண் நாயர் 1 ரன்னில் ஏமாற்றம் அளித்தார்.

3-வது விக்கெட்டுக்கு கேஎல் ராகுல் உடன் கேப்டன் மணிஷ் பாண்டே ஜோடி சேர்ந்தார். இந்த ஜோடி அபாரமான ஆட்டத்தை வெளிப்படுத்தியது. கேஎல் ராகுல் 81 ரன்கள் சேர்த்து ஆட்டமிழந்தார். மணிஷ் பாண்டே ஆட்டமிழக்காமல் 118 பந்தில் 5 பவுண்டரி, 7 சிக்சர்களுடன் 142 ரன்கள் விளாச கர்நாடகா 50 ஓவரில் 7 விக்கெட் இழப்பிற்கு 285 ரன்கள் குவித்தது.

பின்னர் 286 ரன்கள் அடித்தால் வெற்றி என்ற இலக்குடன் சத்தீஸ்கர் அணி களம் இறங்கியது. அந்த அணி 44.4 ஓவரில் 206 ரன்களில் சுருண்டது. இதனால் கர்நாடகா 79 ரன்கள் வித்தியாசத்தில் வெற்றி பெற்றது.

இந்திய அணியில் இடம் பிடித்திருந்த கேஎல் ராகுல் மோசமான ஆட்டத்தின் காரணமாக அணியில் இருந்து நீக்கப்பட்டார். தற்போது விஜய் ஹசாரே டிராபியில் சிறப்பான ஆட்டத்தை வெளிப்படுத்தி வருகிறார்.