உயர் ரத்த அழுத்த பாதிப்பு: 20 கோடி பேருடன் இரண்டாவது இடத்தில் இந்தியா

உயர் ரத்த அழுத்தம் குறித்து லண்டன் இம்பீரியல் கல்லூரியை சேர்ந்த விஞ்ஞானிகள் உலகளவில் மிகப்பெரிய ஆய்வொன்றை நடத்தினர். கடந்த 1975-ம் ஆண்டு முதல் 2015-ம் ஆண்டு வரை உலகளவில் உயர் ரத்த அழுத்த பாதிப்பில் ஏற்பட்டுள்ள மாற்றங்கள் குறித்து விஞ்ஞானிகள் தொடர்ந்து ஆய்வு நடத்தினர்.

இதற்காக சுமார் 2 கோடிக்கும் மேற்பட்டோரின் உயர் ரத்த அழுத்த பரிசோதனைகள் ஆய்வுக்கு உட்படுத்தப்பட்டுள்ளன. ஆய்வின் முடிவில் பல்வேறு திடுக்கிடும் தகவல்கள் கிடைத்துள்ளன.

* ஏறக்குறைய உலகில் சுமார் 113 கோடி பேர் உயர் ரத்த அழுத்தத்தால் பாதிக்கப்பட்டுள்ளனர்.

* மக்கள் தொகையில் முதலிடம் வகிக்கும் சீனா 22.6 கோடி மக்களுடன் உயர் ரத்த அழுத்தத்தில் முதலிடம் வகிக்கிறது. மக்கள் தொகையில் இரண்டாமிடம் வகிக்கும் இந்தியா 20 கோடி மக்களுடன் இரண்டாவது இடத்தில் உள்ளது.

* கடந்த 40 ஆண்டுகளில் உயர் ரத்த அழுத்தம் உலகம் முழுவதும் இரண்டு மடங்கு அதிகரித்துள்ளது. பெண்களை விட ஆண்களையே உயர் ரத்த அழுத்தம் அதிகளவில் தாக்குகிறது.

* தென் கொரியா, அமெரிக்கா, கனடா, பிரிட்டன் ஆகிய நாடுகளில் குறைந்தளவு மக்களே உயர் ரத்த அழுத்தத்தால் பாதிக்கப்பட்டுள்ளனர்.

* ஆசிய நாடுகளைச் சேர்ந்த பாதிக்கும் மேற்பட்டோர் உயர் ரத்த அழுத்தத்தால் பாதிக்கப்பட்டுள்ளனர்.

இதுகுறித்து ஆராய்ச்சி நடத்திய விஞ்ஞானிகளில் ஒருவரான எசாட்டி ஊட்டச்சத்து குறைந்த உணவுகளை சாப்பிடுவதே இதற்கு காரணமென்றும், ஏழை நாடுகளில் இந்த நோயின் தாக்கம் அதிகளவில் இருப்பதாகவும் தெரிவித்துள்ளார்.