வாணிப்புத்தூர் கவுன்சிலர் வீட்டில் தீ விபத்து

டி.என்.பாளையம்:

டி.என்.பாளையம் அடுத்த வாணிப்புத்தூர் பேரூராட்சி 12-வது அ.தி.மு.க. கவுன்சிலராக இருப்பவர் பழனிச்சாமி என்கிற ஹரிராம். வாணிப்புத்தூர் ஜே.ஜே.நகரில் உள்ள இவரது தகர கொட்டகை வீட்டில் புகை வந்தது. அருகில் இருந்தோர் ஓடி வந்து பார்க்கும் போது வீட்டில் தீ முழுவதும் பரவி எரிய தொடங்கியது.

இதனையடுத்து அருகில் இருந்தோர் போலீசாருக்கு தகவல் கொடுத்துள்ளனர். போலீசார் சத்தியமங்கலம் தீயணைப்பு துறைக்கு தகவல் தெரிவித்தனர். சம்பவ இடத்திற்கு வந்த தீயணைப்பு வீரர்கள் தீயை தண்ணீரை பீச்சி அடித்து அணைத்தனர்.

வீட்டை சுற்றி தென்னங்கீற்று வேயப்பட்டு, மேற்கூரை தகர சீட்டால் அமைக்கப்பட்டு இருந்ததால் தீ வீடெங்கும் மலமலவென பரவி எரித்தது.

இந்த தீ விபத்துக்கான காரணம் குறித்து சம்பவ இடத்திற்கு வந்த பங்களாப்புதூர் போலீசார் விசாரணை நடத்தி வருகின்றனர். தீ விபத்தில் உயிர் சேதம் இல்லை, ஆனால் வீட்டில் இருந்த டிவி, பீரோவில் இருந்த 60 ஆயிரம் ரொக்க பணம், பேங்க் பாஸ்புக், துணிகள் மற்றும் வீட்டு உபயோக பொருட்கள் தீயில் கருகி சேதமானதாக போலீசார் தெரிவித்தனர்.