உள்ளூர் செய்திகள்
தமிழக நிதி அமைச்சருக்கு புதுச்சேரி அ.தி.மு.க. கண்டனம்
பெட்ரோல், டீசல் விலையை குறைக்காத தமிழக நிதி அமைச்சருக்கு புதுவை அ.தி.மு.க. கண்டனம் தெரிவித்துள்ளது.
புதுச்சேரி:
புதுவை கிழக்கு மாநில அ.தி.மு.க. செயலாளர் அன்பழகன் வெளியிட்டுள்ள அறிக்கையில் கூறியிருப்பதாவது:-
மக்களின் நலன் கருதி பெட்ரோல், டீசல் விலையை குறைத்த மத்திய அரசின் அறிவிப்பை புதுவை அ.தி.மு.க. வரவேற்கிறது. மத்திய அரசின் அறிவிப்பை தொடர்ந்து எதிர்க்கட்சிகள் ஆட்சி செய்யும் மகாராஷ்டிரம், கேரளா, ராஜஸ்தான் உள்ளிட்ட பல மாநிலங்கள் பெட்ரோல், டீசல் வரியை குறைத்துள்ளன. ஆனால், தமிழக நிதி அமைச்சர் பெட்ரோல், டீசல் வரி குறைக்க மாட்டேன் என பேசுவது கண்டிக்கத்தக்கது.
தமிழகத்தில் மக்களின் நலன் கருதி பெட்ரோல், டீசல் விலையை குறைக்க வேண்டும் என தமிழகத்தின் பிரதான எதிர்க்கட்சி அ.தி.மு.க.வின் கோரிக்கையை தமிழக தி.மு.க. அரசு ஏற்க மறுப்பது ஜனநாயக விரோதமான செயலாகும். தமிழகத்தின் தி.மு.க. அரசு தூக்கி எறியப்படும் நாள் வெகு தொலைவில் இல்லை.
இவ்வாறு அவர் கூறியுள்ளார்.