ஆட்டோ எக்ஸ்போவில் அனைவரையும் கவர்ந்த நெக்சான் ஏரோ

புதுடெல்லி:

டாடா மோட்டார்ஸ் நிறுவனத்தின் பல்வேறு வாகனங்கள் மற்றும் கான்செப்ட்கள் ஆட்டோ எக்ஸ்போ 2018-இல் அறிமுகம் செய்யப்பட்டது. டாடா புதுவரவுகளில் ஒன்றாக அனைவரையும் ஈர்த்த வாகனமாக நெக்சான் ஏரோ இருக்கிறது. டாடா நெக்சான் ஏரோ டாப்-எண்ட் மாடலில் இரண்டு வித ஸ்டைலிங் ஆப்ஷன்கள் அறிவிக்கப்பட்டுள்ளது. 

டாடா நெக்சான் ஏரோ மாடலில் எஸ்.யு.வி.யின் வடிவமைப்பிற்கு தகுந்த பாடிகிட் அட்டகாசமான வடிவமைப்பில் வெளியிடப்பட்டுள்ளது. இதன் பக்கவாட்டுகளில் ஸ்கர்ட், சிவப்பு நிறம் அக்சென்ட் கொண்ட பம்ப்பர் புரோடெக்டர்கள் வாகனத்தின் முன்பக்கமும் பின்புறமும் வழங்கப்பட்டிருக்கிறது. இத்துடன் பிரத்யேக லிக்விட் சில்வர் நிறம் மற்றும் பியானோ பிளாக் நிற ரூஃப் புதிய ஏரோ மாடலை மற்ற மாடல்களை விட வித்தியாசப்படுத்துகிறது. 

நெக்சான் ஏரோ உள்புற கேபினின் சென்ட்டர் கன்சோல், ஸ்டீரிங் வீல் மற்றும் டேஷ்போர்டு உள்ளிட்டவற்றில் அலங்கரிக்கப்பட்ட கிளாஸி பிளாஸ்டிக் மூலம் செய்யப்பட்டுள்ளது. நெக்சான் ஏரோ போன்றே புதிய நெக்சான் ஆக்டிவ் மாடலில் பிரத்யேக வடிவமைப்பு செய்யப்பட்டுள்ளது.

இரு மாடல்களுடன் புதிய நெக்சானில் பிரத்யேக அக்சஸரீகளை கொண்டு மேலும் அலங்கரிக்க முடியும். கூடுதல் அக்சஸரிக்களை வாடிக்கையாளர்கள் டாடா மோட்டார்ஸ் விற்பனை மையங்களில் பெற முடியுயம். 

மெக்கானிக்கல் அம்சங்களில் அதிகப்படியான மாற்றங்கள் மேற்கொள்ளப்படாத நிலையில், புதிய நெக்சானிலும் முந்தைய மாடல்களில் வழங்கப்பட்ட இன்ஜின் வழங்கப்பட்டிருக்கிறது. புதிய நெக்சான் பெட்ரோல் மற்றும் டீசல் என இருவித இன்ஜின்களில் கிடைக்கிறது. பெட்ரோல் மாடலில் 1.2 லிட்டர் டர்போசார்ஜ்டு இன்ஜின் வழங்கப்பட்டுள்ளது. இந்த இன்ஜின் 108.5 பி.ஹெச்.பி. பவர், 170 என்.எம். டார்கியூ செயல்திறன் வழங்குகிறது. 

இதன் டீசல் மோட்டார் 1.5 லிட்டர் இன்ஜின் கொண்டுள்ளது. இந்த இன்ஜின் 108.5 பி.ஹெச்.பி. பவர் மற்றும் 206 என்.எம். டார்கியூ செயல்திறன் கொண்டுள்ளது. பெட்ரோல் மற்றும் டீசல் இன்ஜின்களும் 6-ஸ்பீடு கியர்பாக்ஸ் கொண்டுள்ளது. இத்துடன் டாடா நெக்சான் AMT வேரிண்ட் அறிமுகம் செய்யப்பட்டுள்ளது. இந்த மாடல் இந்த ஆண்டின் பிற்பாதியில் விற்பனைக்கு வரும் என எதிர்பார்க்கப்படுகிறது.

டாடா நெக்சான் ஏரோ விலை அதிகாரப்பூர்வமாக அறிவிக்கப்படவில்லை என்றாலும் இதன் விலை முந்தைய மாடலை விட ரூ.30,000 வரை அதிகமாக இருக்கும் என எதிர்பார்க்கப்படுகிறது.