3 தொகுதிகள் தராவிட்டால் தனித்து போட்டி- பாமக மாநில அமைப்பாளர் தன்ராஜ் தகவல்

புதுச்சேரி:

புதுச்சேரியில் பாரதீய ஜனதா, என்.ஆர். காங்கிரஸ், அ.தி.மு.க. கூட்டணியில் பா.ம.க. இடம் பெற்று உள்ளது.

ஆனால் கூட்டணியில் பா.ம.க.வுக்கு தொகுதி ஒதுக்கவில்லை. இதனால் கடந்த 3 நாட்களுக்கு முன் பா.ம.க. செயற்குழு கூடி புதுச்சேரியில் தனித்து போட்டியிட முடிவு செய்து தீர்மானம் நிறைவேற்றினர்.

முதற்கட்டமாக 15 தொகுதியில் போட்டியிடும் பா.ம.க. வேட்பாளர் பட்டியலையும் பா.ம.க. மாநில அமைப்பாளர் தன்ராஜ் தயாரித்து கட்சி மேலிடத்துக்கு அனுப்பி உள்ளார்.

இந்த நிலையில் பாரதீய ஜனதா மேலிட பொறுப்பாளர் நிர்மல் குமார் சுரானா, முன்னாள் அமைச்சர் நமச்சிவாயம் ஆகியோரை பா.ம.க. மாநில அமைப்பாளர் தன்ராஜ் சந்தித்து பேசினார்.

பின்னர் அவர் நிருபர்களிடம் கூறியதாவது:-

புதுவையில் பா.ம.க. வலுவான கட்சி. தனித்து போட்டியிட்டால் வெற்றி பெற முடியாது. ஆனால் தொகுதிக்கு 2 ஆயிரம் ஓட்டுகள் பிரியும். இதனை பாரதீய ஜனதா- என்.ஆர் . காங்கிரஸ் புரிந்து கொள்ள வேண்டும்.

புதுவையில் 4 தொகுதிகள் கேட்டு கடைசியாக 3 தொகுதி கேட்டோம். தொகுதி தரவில்லை என்றால் தனித்து போட்டியிடுவோம்.

இவ்வாறு அவர் கூறினார்.

இந்த நிலையில் என்.ஆர்.காங்கிரஸ் தலைவர் ரங்கசாமியை பா.ம.க. மாநில அமைப்பாளர் தன்ராஜ் சந்தித்து பேசினார்.